Desizaun ne’e Governu foti, hafoin halo analiza klean ba aprezentasaun husi Sala Situasaun Sentru Integradu Jestaun Krize (SIJK) kona ba pontu situasaun epidemiolójika iha país.

“Konsellu Ministru levanta impozisaun Konfinamentu Obrigatóriu Jerál (lockdown) ba populasaun iha Munisípiu Dili nian, hahú aban husi tuku 23:59, loron 9 fulan-setembru tinan 2021. Nune’e, aban kalan sei la extende tan,”dehan Ministru Prezidensia Konsellu Ministru Fidelis Leite Magalhães, iha Salaun Ministeriu Finansas Aitarak-Laran, kuarta ohin (08/09).

Nune’e, Konsellu Ministru mós husu sidadaun sira hotu iha responsabilidade ba ida-idak nia saúde  no familia nia saúde atu kontinua pratika ho rigor uza maskara, fase liman, distansiamentu ne’ebé hato’o husi Ministeriu Saúde.

Governu mós husu ba instituisaun sira hanesan, igreja, loja, motorista, ba eventu familia sira nian, atu kumpri nafatin protokolu saúde ne’ebé adopta iha Timor-Leste.

Entretantu, Governante ne’e husu ba sidadaun sira atu hakbesik-an ba postu saúde hodi simu vasina, atu nune’e aumenta ema ida-idak nia imunidade.