DILI: Governu Timor-Leste liu husi Ministériu Saude hahú ona preparasaun hodi responde ba ameasa virus Nipah ne’ebé daudaun ne’e espalla iha India no Bangladesh. Preparasaun ne’e inklui atu harii komisaun espesial hodi monitoriza no prevene posibilidade entrada virus refere mai rai laran.

Ministra Saude, Elia dos Reis Amaral hatete, governu sei estabelese komisaun ida hodi organiza medida prevensaun no resposta ba ameasa husi surtu Nipah.

"Tempu badak ita sei harii komisaun surtu ka kominisaun prevensaun atu bele halo… atividade saida mak atu ita halo? depois mak ekipa sira sei informa ba ita-boot sira," dehan Ministra Élia ba jornalista sira, bainhira partisipa iha inaugurasaun sentru desportu, iha Bekora, Tersa (03/02).

Ministra dehan, daudauk ne’e MS halo ona preparasaun inisial, inklui vijilansia iha area fronteira, portu no aeroportu hodi prevene posibilidade transmisaun virus ne’e mai TL.

Elia esplika, virus Nipah laos moras foun, tanba durante ne’e eziste ona iha rejiaun sira Azia hanesan Bangladesh, Nepal, no Índia. Ho situasaun ne’e, governu konsidera importante atu hahú medida antesipasaun hodi proteje saude publika.

Koñese virus Nipah

Organizasaun Saúde Mundíal (OMS) iha ninia informasaun ne’ebé fó sai iha 29 Janeiru 2026 hatete, Virus Nipah nu’udar vírus zoonótiku, ne’ebé hahú husi animál maibé bele mós infeta ema.

Vírus ida-ne’e konsidera hanesan ameasa seriu ba saúde públika tanba iha taxa mortalidade ne’ebé aas.

Orijen no Istória Surtu

Virus Nipah identifika uluk iha tinan 1998 iha Malázia, durante surtu moras entre agrikultór fahi sira.

Iha tinan 1999, kazu sira relata mós iha Singapura hafoin importasaun fahi infetadu husi Malázia. Dezde ne’ebá, laiha surtu foun relata iha nasaun rua ne’e.

Hafoin tinan 2001, surtu vírus Nipah deteta iha Índia no Bangladesh. Iha Bangladesh, surtu relata ona kuaze tinan-tinan, no iha Índia, kazu sira relata periodikamente iha parte oioin nasaun nian, inklui surtu ikus liu iha tinan 2026. Iha tinan 2014, surtu ida relata mós iha Filipina.

Uma-na’in Naturál no Transmisaun

Morcegos aifuan husi família Pteropodidae konsidera hanesan uma-na’in naturál vírus Nipah. Vírus ne’e normalmente transmite husi morcegos ba ema liu hosi:

• Kontaktu diretu ho animál infetadu (hanesan fahi ka kuda),
• Konsumu aihan ka produtu aifuan nian (hanesan bee matak) ne’ebé kontaminadu husi morcegos,
• Bele transmite direitamente entre ema, liu-liu iha família ka iha fasilidade saúde.

OMS mós hatudu katak transmisáun entre ema bele akontese iha ospitál sira ne’ebé nakonu, ventilasaun la di’ak no la implementa ho rigor medida prevensaun no kontrolu infesaun.

Sinál no Sintoma

Períodu inkubasaun virus Nipah varia husi loron 3 to’o 14, maibé iha kazu balun bele to’o loron 45. Sintoma sira ne’ebé komun inklui:

• Isin-manas,
• Ulun-moras no konfuzaun,
• Susar atu dada iis ka mear,
• Fadiga, dukur, muta no diarreia.

Iha kazu grave, virus Nipah bele kauza inflamasaun iha kakutak (ensefalite), kakutak bubu, no dala-barak termina ho mate. OMS kalkula taxa mortalidade virus Nipah iha entre 40% to’o 75%.

Diagnóstiku

Diagnóstiku virus Nipah susar atu halo tanba sintoma sira hanesan moras infesiozu seluk. Teste laboratóriu prinsipál ne’ebé uza mak:

• RT-PCR husi amostra respiratóriu, raan ka líkidu serebroespinál,
• Detesaun antikorpu liu husi ELISA.

Amostra sira tenke maneja ho kuidadu aas tanba risku biolójiku, no teste tenke hala’o iha laboratóriu ho padraun bioseguransa máximu.

Tratamentu no Prevensaun

To’o agora, laiha tratamentu espesífiku ka vasina ne’ebé disponivel ba virus Nipah. Tratamentu ne’ebé eziste mak kuidadu médiku apoiu intensivu, hanesan:

• Monitorizasaun rigorózu,
• Tratamentu oksijéniu bainhira presiza,
• Tratamentu komplikasaun neurolójiku no pulmonár.

OMS subliña katak diagnóstiku lalais no kuidadu apoiu ho kualidade aas bele aumenta oportunidade sobrevivénsia pasiente sira.

Alerta saúde públika

Tanba natureza virus ne’ebé bele transmite husi animál ba ema no entre ema, OMS husu nasaun sira atu aumenta vijilánsia, reforça kontrolu iha fronteira, no hasa’e konsiensia públika kona-ba medida prevensaun, liu-liu iha rejiaun sira ne’ebé iha risku aas.

Hakarak lee notisias nee kompletu, asesu deit pajina e-paper INDEPENDENTE: https://digital.independente.tl edisaun kuarta (04/02).