Print this page
Uma hirak ne'ebe hetan estragus husi inundasaun, iha loron 3,4 Abril 2021. Uma hirak ne'ebe hetan estragus husi inundasaun, iha loron 3,4 Abril 2021.

Governu Hahú Halo Levantamentu Dadus Apoiu Vitima Inundasaun Featured

DILI:Primeiru Ministru (PM), Taur Matan Ruak informa katak, Governu hahú halo ona levantamentu dadus ba vitima sira impaktu husi udan boot ne’ebé akontese iha loron 3,4 fulan-Abril 2021.

“Ohin ami informa buat rua ba iha Prezidente Republika, primeiru lugar ami informa kona-ba dezastre naturais no nia konsekuensia sira ne’ebé ita hotu hatene durante loron hirak nia laran,”dehan nia bainhira remata inkontru ho Prezidente Republika, iha residensia PR Farol, Dili, (08/04).

Xefe Governu ne’e relata katak, impaktu husi dezastre naturais iha loron 3-4 fulan-Abril ne’ebé rejulta populasaun nia uma rihun maka estragus, no ema na’in 42 maka lakon sira nia vida.

Tanba ne’e, Governu hahú hanoin ona atu foti medidas oinsa atu minimiza no normaliza fali situasaun ne’ebé vitima sira enfrenta no infrastrura hirak ne’ebé estragus.

Vitima sira ne’ebé atu hetan apoiu tama iha kategoria tolu. Kategoria dahuluk, maka uma sira ne’ebé lakon total, daruak maka ema sira ne’ebé sei iha uma maibé sasan uma laran ne’ebé la aproveita, no datoluk maka ema sira ne’ebé uma bee no tahu tama.

“Naturalmente iha grupu tolu, grupu ida mak sira nia uma lakon total, no ita sei halo levantamentu atu hatene familia sira ne’ebé lakon uma total hira no iha fatin ne’ebé deit, no haree mós tempu oin mai bele fó apoiu ba sira, segundu grupu mak ema sira ne’ebé sei iha uma maibé sasan uma laran ne’ebé la aproveita, terseiru mak ema sira ne’ebé uma bee no tahu tama,”dehan PM Taur, hafoin halo inkontru semanal ho Prezidente Republika (PR), iha residensia PR, Farol Dili, kinta ohin (8/4).

Ho nune’e Governu halo ona levantamentu no prepara planu atu ba oin bele fó apoiu ba maluk sira ne’ebé hetan dezastre naturais no hadia mós infraestutura rai laran.

Tuir dadus Sekretaria Estadu Protesaun Sivil (SEPS) relata dadus familia uma kain hamutuk 2,375, ho total ema 9,779 husi Munisipiu Dili maka hela iha sentru evakuasaun 18.

Entretantu dadus ba uma ne’ebé estragus iha kapital Dili no Munisipiu sira seluk seidauk iha data fiksa, maibé dadus preliminaria kuaze rihun 3.

Orsamentu ne’ebé Governu prepara atu rekopera fali situasaun dezastre natural no pandemia Covid-19, hamutuk millaun $250 ne’ebé tama iha kategoria orsamentu retifikativu.

 

Jornalista: saturnina da Costa

Editor: Jose Sarito Amaral

Read 1166 times
Rate this item
(0 votes)

Related items