Ministru Petroleu no Rekursus Minerais, Francisco da Costa Monteiro, hatete, asina akordu ida ne'e sei realiza iha semana oin.

"Sim, ohin desizaun Konsellu Ministru fó poder tomak mai ha'u nu'udar Ministru Petróleu no Rekursu Minerais, atu asina akordu kooperasaun ho Woodside Energy, kona-ba projetu Timor-Leste Liquefied Natural Gas, ne'ebé sei akontese iha Segunda oin mai," dehan Ministru Francisco iha Palásiu Governu, Sabadu (22/11).

Nia dehan, akordu ida ne’e aliña ho Governu nia esforsu estratéjiku sira atu valoriza rekursus naturais nasionál  nian, tuir Planu Estratéjiku Dezenvolvimentu 2011-2030 nian, no hatudu pasu importante ida ba avaliasaun téknika, komersiál, no regulatória konjunta kona-ba futuru unidade LNG ida iha territóriu Timor-Leste.

"Negosiasaun sira ne'ebé hala'o husi Ministériu Petróleu no Rekursus Minerais ho Woodside Energy, ne’ebé na’in ba parte husi kampu Greater Sunrise nian, kria ona kondisaun nesesária hodi formaliza kooperasaun ida ne'e, ne'ebé fó dalan hodi halo estudu kle’an ne’ebé esensiál ba dezenvolvimentu projetu ne’e," nia esplika.

Ho desizaun ida ne’e, Governu avansa iha prosesu implementasaun ba vizaun ida ne’ebé buka atu reforsa industrializasaun enerjétika nasionál, promove diversifikasaun ekonómika, no garante katak benefísiu husi rekursus Greater Sunrise nian sei kontribui direta ba dezenvolvimentu nasionál.

Aprova termu referénsia ba konkursu mineiru públiku

Iha reuniaun ne’ebé hanesan, Konsellu Ministru aprova Termu Referénsia ba Konkursu Mineiru Públiku ba Konsesaun Lisensa Prospesaun no Peskiza ba Minerál Metáliku, Gemas, Minerál Industriál, Minerál Radioativu no Minéiru no Rai Raru (ne’ebé ladún barak).

Ministru Francisco informa, ida ne'e termu referénsia ba segunda ronda de tenderizasaun internasionál ba blokus mineirus nia.

"Termu referénsia sira ne'ebé agora aprova, estabelese enkuadramentu nesesáriu hodi hala'o konkursu públiku iha setór rekursu minerál, tuir Kódigu Mineiru nian, garante regras ne'ebé klaru no transparente no aliña ho prátika internasionál sira ne'ebé di'ak liu," dehan nia.

Nia esplika, hafoin loke área sira ne'ebé destina ba atividade mineiru, ne'ebé deside husi Governu iha Marsu 2023, desizaun ida ne'e atu promove oportunidade foun kona-ba investimentu no kria kondisaun ba dezenvolvimentu sustentável iha setór ne'e.

Ministru hatutan, konkursu públiku ne'e sei lansa iha semana ikus fulan Novembru nian.

Avaliasaun ba proposta sira sei hala'o husi Juñu to’o Jullu 2026, ho anúnsiu rezultadu sira ne'ebé prevee ba Jullu no emisaun ba lisensa sira ne'ebé marka ona ba Agostu 2026.