Sekretáriu Estadu Teras Propriedade, Jaime Xavier Lopes hateten, enkontru ne'e atu buka alternativu no espasu seluk ne'ebe iha Tasi-Tolu hodi atribui ba FFTL atu dezenvolve estádiu.

“Ita nafatin deside area iha Tasi tolu, ita foti fali husi parte loro-monu nian, tanba fatin antes ne'e Igreja la aseita,” Katak nia ba jornalista sira, hafoin remata enkontru ho FFTL, iha kna'ar fatin Kolmera, Segunda (20/04).

Govenante ne'e afirma, parte rua deside atu utiliza fatin husi altar kotuk hodi harii estadiu foun no kampu futsal Indoor ida.

“Ita  nia teniku sira sei ba halo levantamentu hodi define, depois ami foti desizaun oinsa atu halo indimnizauan ba komunidade sira ne'ebe okupa fatin ne'e,” Nia dehan.

Iha fatin hanesan Prezidente FFTL, Nilton Telmo Gusmão afirma, antes ne'e antes ne'e desizaun husi governu ba konstrusaun estadiu foun iha ona, maibe parte igreja mak la konkorda atu harii estádiu iha Tasi tolu.

"Ita hateten katak Dioseze tolu la aseita ho ideia inisial atu harri estádiu besik altar, tanba ne’e governu rasik hanoin katak ita bele konserva area ne’ebá ba area relijiaun, maibe ita buka fali iha sorin husi altar kotuk hodi dezenvolve estádiu ho padraun internasionál,” Nia afirma.

Dadaun, Nilton Gusmão deklara seidauk iha desizaun final, tanba sei halo estudu tekniku ba area ne'ebe deside ona.

“Depois levantamentu husi SETP, hafoin ita bele haree, importante iha espasu sufisiente ba ita atu dezenvolve infraestrutura liu-liu estádiu,”  Nia afirma.

Purtantu Prezidente Autoridade Munisipiu Dili, Francisco dos Santos hatete, nia parte sente orgullu tanba parte governu deside ona área seluk husi Tasi-tolu hodi atribui ba FFTL no FIFA hodi dezenvolve estádiu.

“Ita sente orgullu tanba iha tempu besik bele realiza inisiativa husi FFTL no FIFA, tanba ne’e Autoridade munisipiu kontinua kolabora ho parte hotu, atu realiza ida ne'e,” Katak nia.

Maibe, nia dehan, preokupasaun ida mak area referidu komunidade barak mak hela iha ne'eba, nune'e bainhira atu hasai tenke trata sira ho dignu.

“Hakarak ka lakohi ita tenke trata ita nia ema sira ne'e hanesan umanu, entaun ita sei halo identifikasaun ba ema sira ne'e, nune'e ita tau orsamentu oituan hodi fo indimnizauan,” Nia salienta.