Primeiru Ministru, Taur Matan Ruak dehan, Xefe Estadu veta ona Lei Atividade Petrolífera, ne’e duni Governu tenke estuda fallansu no tanba saida mak Prezidente Repúblika veta lei ne’e.

Ne’e duni, Xefe Governu deklara kompeténsia tomak Parlamentu Nasionál mak bele responde ba kestaun LAP ne'ebé Xefe Estadu veta ona.

“Ne’e Parlamentu Nasionál mak estuda no hadi'a hodi fó ba Prezidente Repúblika atu haree se lae Parlamentu Nasionál bele haree opsaun seluk atu haree preokupasaun ne’e”, dehan PM Taur, iha Parlamentu Nasionál, horisehik.

Nune’e, Xefe Governu deklara, kompeténsia tomak iha Parlamentu Nasionál atu haree lei ne'ebé Xefe Estadu veta ona, tanba ne’e governu tenke koordena ho deputadu sira atu rezolve lalais hodi lori fila ba Prezidente Repúblika.

PM Taur hateten, preokupasaun Xefe Estadu nian mak oinsá Tribunál Konta ho Parlamentu Nasionál inklui Prezidente Repúblika tenke kontrola didi'ak lei ne’e.

Maibé, Governu mós prepara ona atu hatama orsamentu ba sosa asaun ConocoPhillips ho Shell nian iha ne’ebé Estadu Timor-Leste sosa ona hamutuk tokon $650 ho 56,56%.

Tanba ne’e, Xefe Governu garante katak kona-ba fundu atu sosa asaun ne’e governu sei buka mekanizmu, maibé depende ba deputadu sira Parlamentu Nasionál mak tenke koopera malu hodi hetan solusaun.

Governu Timor-Leste liu husi Xefe Negosiadór Prinsipál Fronteira Marítima asina ona akordu ho kompañia ConocoPhillips hodi sosa asaun hamutuk 30% ho osan hamutuk tokon $350. Nune’e, halo mós akordu ho kompañia Shell hodi sosa asaun 26,56% ho totál osan tokon $300.

Maski nune’e, polítika ne’e difisil atu realiza hafoin Prezidente Repúblika deside hodi veta Lei Atividade Petrolíferu, ne’ebé fó biban ba Estadu Timor-Leste atu bele iha asaun ba atividade petrolífera nian másimu 20% de’it.