Tuir Ministru Prezidensia Konsellu Ministru, Fidelis Leite Magalhães hatete, alterasaun ida ne’e ho objetivu simplis atu loke dalan, ba sidadaun sira ne’ebé ba hetan apoiu husi Governu nian bele sai husi uma ho simu apoiu ne’ebé Governu fó.

“Ho projetu Rezolusaun Governu ida-ne’e, hahú permite sidadaun sira ne’ebé rezidente iha Dili, esesionalmente, bele sai husi sira-nia hela-fatin ka ninia fatin alojamentu, ne’ebé inklui sentru akollimentu, iha munísipiu Dili nian, hodi rekere prezensialmente asesu ba apoiu Sosioekonómiku prevee iha Lei n. 8/2021, loron 3 fulan-maiu,”dehan nia iha konferensia imprensa iha Ministeriu Finansas, Aitarak laran, Dili (05/05).

Nia fó ezemplu hanesan, bainhira sidadaun ida presiza atu ba iha Instituto Nasional Seguransa Sosial, bainhira polisia sira halo para sidadaun refere, sidadaun refere bele hatudu komprovativu atu nune’e polisia bele autoriza.

Hanesan mós ho sidadaun sira ne’ebé atu ba iha fatin apoiu aihan no apoiu umanitaria sira seluk tan. Ho nune’e ohin iha alterasaun ne’e loke dalan ba ida ne’e.

Asisten Editor: Saturnina da Costa