Serimónia entrega kareta hala'o husi Primeira Sekretária Embaixada Austrália iha Timor-Leste, Kalo Tafalo, akompañadu husi Segundu Sekretáriu, Declan Hickey, ba Sekretáriu Estadu ba Formasaun Profisionál no Empregu, Rogério Araújo Mendonça, iha resintu SEFOPE Kaikoli, tersa (10/03).
Depois de entrega kareta, Sekretáriu Estadu, Rogério Araújo Mendonça hato'o ninia agradese ba Governu Austrália liu husi Department of Foreign Affairs and Trade (DFAT).
Nia dehan, kooperasaun ne'ebé governu rua hala'o ne'e hanesan parte husi Governu Austrália nia apoiu ba Governu Timor-Leste iha aspetu oioin, liuliu ba mobilidade laborál.
"Ohin mak momentu importante tebes, ne'ebé refleta kooperasaun forte entre Governu Austrália no Timor-Leste liu husi Sekretáriu Estadu ba Formasaun Profisionál no Empregu, iha asuntu mobilidade laborál ba Austrália," dehan Sekretáriu Estadu.
Sekretáriu Estadu esplika katak, apoiu ne'ebé Governu Austrália oferese ne'e ajuda tebes SEFOPE hodi hala'o sira-nia servisu mobilidade laborál ho efetivu.
"Hanesan ita hotu hatene, agora ita-nia programa mobilidade laborál desentraliza ona iha munisípiu hotu-hotu. Prosesu rekrutamentu partisipante sira, no mós formasaun atu atualiza perfil partisipante sira-ne'e, hala'o ona iha munisípiu hotu. Entaun, atu ami bele halo monitorizasaun ba servisu sira-ne'e iha munisípiu, ita presiza apoiu transporte. Ne'e duni mak Governu Austrália ohim apoia ita ho kareta rua ne'e," haktuir Sekretáriu Estadu.
Sekretáriu Estadu akresenta tan katak, karreta rua ne'ebé SEFOPE simu ohin sei uza hodi habilitas liu tan atividade monitorizasaun no operasaun iha baze. Objetivu prinsipal mak atu nune'e bele garantia susesu boot liu ba programa mobilidade laborál Austrália ne'ebé expande ona iha munisípiu sira hotu.
"Kareta rua ne'ebé ohin SEFOPE simu, sei utiliza hodi ajuda hakbit liu tan atividade monitorizasaun no operasaun iha baze, hodi nune'e bele garantia susesu ne'ebé boot liu ba programa mobilidade laborál Austrália ne'ebé expande iha munisípiu sira hotu," hateten Sekretáriu Estadu.
Entretantu, espesifikamente ba kareta rua ne'e, Kareta ida entrega ba Sekretáriu Estadu nia gabinete hodi uza ba viajen monitorizasaun ba munisípiu sira.
Monitorizasaun ne'e inklui vizita ba sentru formasaun lian Inglés ne'ebé prepara jovem sira antes sira ba servisu iha Austrália. Kareta ida seluk sei uza ba servisu operasional SEFOPE nian loron-loron, hanesan transporte ekipa ba atividade sira iha Dili no munisípiu.
Iha serimónia entrega kareta rua ne'e, partisipa mós husi Diretór-Jerál SEFOPE, Xefe Gabinete, Manager PLMSP (Australia's Pacific Labour Mobility Support Program), Diretór Nasionál sira, no funsionáriu SEFOPE nian.