Xefe Estadu Maiór Jenerál F-FDTL, Tenente Jenerál Domingos Falur Rate Laek, hatete, parte rua F-FDTL ho PNTL halibur hamutuk iha momentu istóriku ida ne'e, hodi ultrapasa serimónia formatura simples ne'e, reprezenta sinteze institusionál nasaun joven ne’e nian, ne'ebé inkorpora iha Forsa Tarefa Konjunta, ne'ebé dezeña atu garante dame no hakmatek durante periódu krítiku sira iha vida Nasionál.
Nia dehan, diretiva politika ne'ebé Konsellu Ministrus aprova la'ós de'it dokumentu administrativu, maibé marka estratéjiku ida ne'ebé reafirma maturidade institusional.
Nune’e, iha kontestu ida ne’e ekipa rua F-FDTL ho PNTL hetan tan responsabilidade adisional ida, liliu adezaun istórika Timor-Leste nian ba ASEAN iha loron 26 fulan-Outubru tinan ne’e iha Kuala Lumpur.
“Ita-nia trajetória nu'udar nasaun ida hatudu ho klaru katak susesu iha pilar fundamental tolu, respeitu, adezaun rigorozu ba kadeias komandu, no kapasidade atu servisu hamutuk, prinsípiu sira ne'ebé forma dezde tempu eróiku sira luta libertasaun nian, kontinua sai ita-nia matadalan ba institusional,”dehan nia iha Kuartel UEP, Bairo-Pite, Dili, Kuarta ne’e (30/10/25).
Xefe Estadu Maiór Jenerál F-FDTL, Tenente Jenerál Domingos Falur Rate Laek hatutan, Forsa Tarefa Konjunta entre F-FDTL no PNTL la'os de'it reprezenta estratéjia operasionál ida, maibé simboliza unidade Nasionál.
“Ita-nia misaun ba periodu kritiku sira ne'ebé sei mai iha dia 28 Novembru, Loron Finadu nian, Natal, no Loron Tinan Foun nian, sei ezije husi ita ida-idak, tau sentidu aas liu kona-ba responsabilidade institusional no kompromísu ba dame,’tenik XEMFA".
Nia afirma, agora ita hetan observasaun Ia'os de'it internalmente, maibé husi komunidade rejionál ida ne'ebé hein ita nia maturidade, profisionalizmu, no abilidade jestaun institusional husi ita.
"Ha'u hakarak subliña, respeitu ba malu, halo kolaborasaun inter-institusional mak setór sira ne'ebé sei lori ita ba susesu. Ne'e la'os formalidade de'it, maibé dever sagradu ba ita-nia ezisténsia nu'udar instituisaun Estadu nian".
Iha fatin hanesan, Komandante Jerál PNTL, Komisáriu Jerál Henrique da Costa hatete, atividade balun ne’ebé forsa rua implementa ona bazeia ba rezolusaun governu ne’ebé maka fó sai iha fulan rua ba kotuk.
Nune’e, forsa rua ne’e sei halo movimentu hodi hatudu ba komunidade sira katak sira pronto para atu servisu tanto iha preventiva no mós represiva ba situasaun saida de'it mak akontese.
“Importante maka servisu hamutuk, atu bele lori susesu ba iha operasaun ida ne’e,”haktuir KomJer.
Entretantu, parada formatura Operasaun Ouro Forsa Tarefa Konjunta F-FDTL ho PNTL Prejide husi Xefe Estadu Maiór Forsa Armada (XEMFA) Tenente Jenerál Domingos Raul “Falur Rate Laek”, akompaña husi Komandante Jerál PNTL Komisariu Jerál Polisia Henrique da Costa hamutuk ho Segundu Komandante Jerál PNTL Komisariu Polisia Pedro Belo, Maijár Jenerál F-FDTL Cornelio Ximenes “ “Maunana” hamutuk ho ofisial superior PNTL ho F-FDTL sira.