Programme Manager Tuberkoloses (TBC) Klinika Bairo-Pite, Moises Maia Soares hatete, Klinika Bairo-Pite kontinua fó asistensia medika ba moras TBC maski Timor Leste enfrenta pandemia moras Covid-19 no serka snitaria, maibé la difikulta profesional saude sira hodi kontinua fó asistensia saúde ba komunidade sira ne’ebé hetan moras.
Nune’e, durante fulan haat nia laran Klinika Bairo-Pite iha doutor espesialista TBC nain rua mak sempre halo diagnostiko hodi indentifika moras TBC sira ne’ebé mai konsulta ne’e.
“Bazea ba dadus husi fulan januario to’o fulan-abril Klinika Bairo-Pite rezista pasiente TBC hamutuk 134 pasiente, kompostu husi janeiru iha na’in 39, fevereiru iha 54, marsu iha 25 no abril iha 16,”dehan nia iha knar fatin klinika Bairu-Pite ba Online INDEPENDENTE, kinta ohin, (06/05).
Nia hatutan, husi numeru pasiente ne’e iha bebe fulan 6-9 hamutuk nain 5, nune’e professional saúde sira nafatin fó aimoruk hodi konsumu to’o fulan neen, no balun sei baixa hela iha Tibar no mós balun iha ida-idak nia uma.
Total pasiente TBC 134 ne’e mai husi Munisipio 12 inklui RAEOA ne’ebé mai halo tratamentu intensivu iha Klinika Bairopite durante ne’e.
Entretantu, husi numeru pasiente TBC na’in 134 iha na’in 5 mak iha fulan fevereiru nia laran tanba sira iha mós moras komplikadu seluk.
Nune’e pasiente barak mak iha ona mudansa hodi atinji ba faze rekuperasaun nian, no professional sira nafatin tau matan ba sira hodi kontinua fó aimoruk ba sira hodi konsumu to’o fulan 6.
"Programa ba TBC nian tenke hemu aimoruk to’o fulan 6, depois fulan 6 hotu Dr, espesialista sira sei leno fila-fali atu hatene lolos moras TBC ne’e, karik sei positivu entaun kontinua fó aimoruk hodi hemu to’o sira nia kondisaun saúde estavel lolos mak foin para,”dehan nia.
Iha oportunidade ida ne’e lori Klinika Bairo-Pite nia naran hakarak agradese no hato’o obrigadu wa’in ba Governu Timor-Leste liuhusi gabinete Primeiru Ministru no Organizasaun Mundial Saude (OMS) ne’ebé durante ne’e finansia ona Klinika Bairo-Pite.
Asisten Editor: Saturnina da Costa