Print this page

FRETILIN, PLP, KHUNTO sei Halo Konferensia Hafoin Asegura PN Featured

By Aquino Gomes Maiu 15, 2020 2242
Bankada tolu halo konferensia ba imprensa. Dok Bankada tolu halo konferensia ba imprensa. Dok

DILI: Partidu politiku tolu ne’ebé daudauk ne’e fó apoiu ba governu konstitusional daualu ne’ebé lidera husi Primeiru Ministru Taur Matan Ruak sei realiza konferensia hodi formaliza sira-nia “bloku” hafoin asegura Parlamentu Nasionál.

Deklarasaun ne’e hato’o husi Vise Prezidente Bankada KHUNTO iha Parlamentu Nasionál, Luis Roberto da Silva, relasiona ho deklarasaun husi parte CNRT ne’ebé husu atu partidu tolu ne’e presiza formaliza sira-nia koligasaun.

Deputadu Luis dehan, FRETILIN, PLP no KHUNTO sei halo konferensia, maibé seidauk bele halo iha tempu agora tanba situasaun la permite.

“Agora paraliza funsionamentu Parlamentu Nasionál nian, depois politiku de’it mak ezije malu halo konferensia, entaun ita sei abandona hotu funsionamentu Parlamentu,” dehan nia iha PN, Kinta (14/05).

Nia dehan, iha tempu oin, bainhira period estadu emerjensia ne’e remata, partidu politiku tolu ne’e iha dalan atu halo konfernsia.

“Hanoin iha ona dalan, komunikasaun, hodi hamosu ona Aliansa Maioria Parlamentár ida iha Parlamentu Nasionál, tanba bankada tolu hamutuk ona halo karta destitusaun, ida ne’e maioria ona no prienxe ona rekejitus hodi tau ba ajenda,” dehan nia.

Tuir nia, atu asegura governasaun ida, tenke liu duni husi dalan legal ne’ebé bele kesi partidu sira ne’ebé tama iha koligasaun.

“Ha’u fiar katak partidu tolu ne’e iha ona lina komunikasaun di’ak atu halo konferensia ida hamutuk par atu hatudu ba públika katak partidu tolu ne’e kria aliansa maioria Parlamentár,” nia hatete.

Rate this item
(0 votes)