Print this page

FRETILIN Husu Governu Hadi’a Kestaun Fundu Covid-19

By Aquino Gomes Agostu 11, 2020 1839
FRETILIN. FRETILIN.

DILI: Bankada Parlamentár FRETILIN husu VIII Governu atu hadi’a kestaun fundu Coronavirus Disease 2019 (Covid-19) atu bele atende situasaun emerjénsia ne’ebé nasaun hasoru.

Vise-Prezidente Bankada FRETILIN, Josefa Alvares Pereira Soares hateten, ezekusaun fundu Covi-19 la’ós bankada opozisaun de’it mak kestiona.

“Maibé ida husi Bankada governu mós haree katak iha buat balun ne’ebé ezekuta ona, maibé mós fallansu balun ne’ebé tenke hadi’a. Atu responde ba situasaun agora daudaun, sira tenke hadi’a mós kestaun ne’e ho di’ak atu bele responde ba moras Covid ne’e,” dehan nia, iha Parlamentu Nasionál, horisehik.

Josefa dehan, governu tenke utiliza osan ne’e ho kombate Covid, atu labele atake no lori vítima ba povu Timor-Leste.

Nia hatutan, moras Covid-19 laiha interese iha laran, tanba moras ne’e perigu ema nia vida, governu tenke toma medida ho lalais.

“Laiha politizasaun, hakarak kona mate tiha mak foin fiar katak Covid mai tiha ona, hakarak ida ne’e ka? Ita tenke prevene antes, see iha ona ida, se nia ba ona iha izolamentu ne’e katak iha ona vítima, entaun ita hakarak mate tiha mak foin ita dehan mate tiha ona, ne’e mak foin ita fiar, ita labele toman demais haree mak fiar,” dehan nia.

Iha fatin hanesan, Vise-Prezidente Bankada CNRT, Patrocínio Fernandes dos Reis hateten, hanoin ba ezekusaun ba fundu Covid-19 kapasidade governu nian laiha, la’ós de'it ba fundu Covid de'it, maibé orsamentu hotu.

Kona-ba prezensa governu hodi halo konfirmasaun votu ba Estadu Emerjénsia, nia dehan, Bankada CNRT haree katak bele iha nesesidade, bele mós laiha nesesidade, tanba autoriza tiha Estadu Emerjénsia.

Nia hatutan, laiha situasaun ne’ebé tenke halo buat sira ne’e luflafu de’it, tanba kazu ida ka rua mas haree situasaun normál.

“Ita la haree katak distúrbiu públiku ne’e makaas, tanba ne’e mak ita trata Estadu ne’e ho kuidadu,” dehan nia.

Nia hatutan, la’ós Bankada CNRT la konkorda ho Estadu Emerjénsia, maibé oinsá trata Estadu ne’e ho dignu, la presiza tenke luflafu.

Tanba pedidu prezidente repúblika mai tuku 3:00, depois tuku 3:30 Parlamentu Nasionál diskute sem prezensa governu nian, mas obriga tenke aprova tanba ne’e presiza prezensa governu momentu diskusaun Estadu Emerjénsia.

“Pedidu Estadu Emerjénsia ne’e parsiál, oinsá mak atu muda ema nia hanoin, ne’e presiza governu mak bele esplika ba ida ne’e,” dehan nia.

 

Rate this item
(0 votes)

Related items