“Ami reforsa hela relasaun sira entre Fransa ho Timor-Leste. Semana oin, Prezidente Ramos-Horta sei bá Paris atu hasoru Prezidente Fransa, Emmanuel Macron. Timor-Leste ho Fransa hametin konkretamente relasaun bilaterál hodi lansa projetu tanjível sira iha domíniu defeza no seguransa, agrikultura no nutrisaun, turizmu no ekonomia," Dehan Fabien Panome, iha Palásiu Governu, Segunda (16/02).

Nia dehan, Fransa mós enkoraza hela mobilidade sientífika ho Timor-Leste hodi simu estudante PhD sira iha Fransa.

Nia dehan, durante hasoru-malu ne’e, diskute mós kona-bá aspetu hotu-hotu hosi kooperasaun iha área defeza, seguransa, akonomia, akadémika no kulturál no Primeiru-Ministru hato’o vontade boot atu dezenvolve liu-tán kooperasaun ida-ne’e, fó apoiu tomak bá projetu oioin ne’ebé hala’o ona.

“Timor-Leste ho Fransa estabelese relasaun diplomátika no kooperasaun bilaterál iha tinan 2002, hafoin Timor-Leste hetan independénsia ofisiál iha 20 Maiu 2002,” Nia esplika.

Nune'e mós Fransa mak nasaun ida ne’ebé rekuñese independénsia Timor-Leste nian no depois estabelese relasaun diplomátika formál iha tinan ne’e.

“Desde ne’ebá, nasaun rua servisu hamutuk iha área hanesan edukasaun, saúde, enérgia no dezenvolvimentu,” Tenik nia.

Editor: Aquino Gomes