Xefe Estadu Maior Jeneral F-FDTL, Tenente Jeneral Domingos Raul Falur Rate Laek hatete, tuir propostaTenente Jeneral Ezersito Australia nian katak, sira hakarak atu estabelese tan kooperasaun direta entre Forsa Terrestre Baukau ho Ezersitu Australia no Nova-Zelandia.
Nune’e, Tenente Jeneral Falur Rate Laek mós aseita ho proposta ne’e, maibé sei ajenda ba iha enkontru bilateral hodi kria programa hafoin implementa.
“Tuir proposta ne’ebé Tenente Jeneral Ezersito Australia nia katak, sira hakarak atu estabelese tan kooperasaun direta entre Forsa Terrestre Baukau ho Ezersitu Australia no Nova-Zelandia nian, entaun ha'u hatan ba sira katak, ne'e bele hotu, depois maka koalia liu-husi enkontru bilateral, para tau ba programa, oinsa no to'o bainhira maka bele implementa,”dehan Xefe Estadu Maior Jeneral F-FDTL, Tenente Jeneral Domingos Raul Falur Rate Laek, bainhira simu vizita kortejia husi Xefe Estadu Estadu Maior Jeneral Ezersito Australiano, Tenente Jeneral Simon Stuart ho Xefe Estadu Maior Jerál Novazelandia, Maijor Jerál Rose King iha Kuartel Jeneral F-FDTL, Fatuhada, Dili, Sesta (13/06/25).
Iha fatin hanesan, Xefe Estadu Maior Jerál Novazelandia, Maijor Jerál Rose King afirma, kooperasaun atu sotisfikadu liu tan atu bele apoiu malu no amizade ne’ebé forte liu tan.
“Kada tempu ne’ebé ha’u mai sempre haree progresu no mós melloramentu, ne’e tanba saida, tanba ita nia kooperasaun, ita-nia kooperasaun la'ós mai halo liu tan, maibe hakarak ita-nia kooperasaun atu sotisfikadu liu, atu nune’e ita bele apoiu malu iha área ne'ebé maka presiza hadi’a di'ak liu tan. Buat ne’ebé maka ha'u hakarak husu maka servisu hamutuk nafatin, prinsipalmente,iha ita-nia amizade no relasionamentu,”dehan Maijor Jerál Rose King.
Entretantu, Xefe Estadu Estadu Maior Jeneral Ezersito Australiano, Tenente Jeneral Simon Stuart reforsa, Forsa Armada Australia hakarak servisu hamutuk nafatin ho Forsa Armada Timor-Leste ho komitmentu ne’ebé hanesan ba future hodi garante prosperiedade ba povu no nasaun, liliu ba paz no seguransa.
“Ha'u kontenti tanba ha'u bele fila-fali mai Timor, ami-rua Maior Rose King bele hasoru kolega F-FDTL sira ne'ebe uluk servisu hamutuk iha tinan 20 resin liu bá, serbisu nia benefisiu ne'ebe ita hetan sura la-bele no husu nafatin atu serbisu hamutuk ho komitmentu hanesan ne'e ba iha futuru, hodi garante ba nasaun ida-idak no mós ba rejiaun ne’ebé iha prosperiedade ba ita-nia povo ninian no la-bele fó risku ba ita-nia populasaun no proteje páz no seguransa,”tenik Tenente Jeneral Simon Stuart.
Ho nune’e, tuir Tenente Jeneral Simon, servisu hamutuk maka savi importante atu lori nasaun ba oin, tanba Australia komprometidu nafatin apoiu nafatin Timor-Leste.