Tuir Sekretariu Jeral Uniaun Agrikultura Covalima, Bendito Amaral Barros hanesan mós observadór iha terrenu hatete, impaktu lockdown ba negosiante sira hahú menus nesesidade bazika no folin fós kontinua sa’e.

“Lockdown ne’e fó impaktu tebes ba komunidade sira tanba  sasan nia folin iha merkadu suai antes lockdown no depois lockdown hanesan  nessesidade Bazika sira fós 25kg antes ne’e nia folin $ 13.00 dolar no depois lockdown  fós 25kg nia folin folin komesa sa’e ba $14.00 dolar to’o $ 15.00 dolar,”dehan nia

Entretantu, Xefe Aldeia Hatu no Lela Postu-Administrativu Maucatar Jeferino Verdial afirma, iha Postu-administrativu Fatumea no Maucatar fós sira komesa stok hotu no folin komesa sa’e ba $17.50 sentavus.

“Iha postu-administrativu Fatumea ita iha Suku Nanu, Babulik leten, Alas tehen, ho aldeia 12 husi aldeia 12 ne’e aldeia 3 mak sei hetan apoiu emerjensia liga ho lockdown hanesan Aldeia Babulik leten, Klau halek no mane kiik”, tenik nia.

Nia relata, Postu-Administrativu Maucatar ho nia suku Holpilat no iha aldeia 4 hanesan Aldeia hatu, Lela, Nainare no manulor, sira ne’e mak hetan estragus husi dezastre naturais husi udan bo’ot hodi estraga sira  nia produtu lokal sira hanesan Batar, Fore no seluk tan.

Antes ne’e Ekipa Servisu Covalima Vitória Domin-20 (EKSES COVID-20) fó apoiu ona fós saku 200 ba komunidade sira ne’ebé afetadu Covid-19.