DILI: Iha tinan ida ne’e, Fundu Dezenvolvimentu Kapital Humanu, disponibeliza bolsu estudu 143 ba Timor-oan sira hodi kontinua estudu ba rai li’ur ho total orsamentu millaun $1.8.
Diretór Ezekutivu FDCH, Julio Aparicio hatete, ba tinan ida ne’e FDCH sentraliza bolsu estudu 143 ba Indonezia, Malazia, Mosambike, Brazil no Portugal.
"Vaga bolsu estudu ba tinan ne'e hamutuk 143 ne'ebe sentraliza iha FDCH, ba nasaun Brazil na'in 75, Mosambike na'in 8, Malazia na'in 22, Indonézia na’in 28,” dehan Julio iha nia knar-fatin, Kolmera, Kinta (19/02).
Ba area estudu, nia dehan, ba area lisensiatura na'in 66, ba mestradu 50 no ba doutoramentu na'in 7.
Bolsu estudu ne’e loke mós ba dosente ensinu superiór privadu sira ba vaga 20, kompostu husi na'in 10 ba Portugal no na'in 10 ba brazil.
Nia informa katak bolsa estudu bá Brazíl husi kursu lisensiatura 34 iha área serbisu sosiál 4, ensinu pedagójika 5, ensinu fízika 3, kímika 3, biolojia 3, matemátika 4, no siénsia biolójiku 2.
Ba mestradu 34 ne'ebé destina ba área biolojia mariña no ambiente kosteira 2, ensinu siénsia natureza 3, dinámika oseanu no rai 2, ensinu edukasaun 4, lian-portugés 9, planeamentu matemátika sistema 4, enerjétiku 2, sustentabilidade sosiuekonómika ambientál 2, turizmu no patrimóniu inovasaun 3, no empreendedorizmu 3.
Ba doutoramentu 7, disponibiliza ba área estudu ensinu lian-portugés 5 no matemátika 2.
Ba Mosambike iha vaga 8 ba iha nivel lisensiatura ho área siénsia informasaun jeográfika 2, enjeñaria florestál 2, no medisina jerál 4.
Bá Malázia iha vaga 22, maioria ba nivel mestradu hamutuk 16 iha área siénsia seguransa sibernétika 2, siénsia intelijénsia artifisiál 2, jestaun projetu 2, infraestrutura no estudu ekónomiku 2, enjeñaria 3, filozofia enjeñaria 3, no jestaun administrasaun no empreza 2.
Aleinde ne'e nivel lisensiatura iha 6 ba área psikolojia 4, no enjeñaria eletrónika 2.
Vaga bá Indonézia iha 28, ba nivel lisensiatura iha área enjeñaria mekánika 4, enjeñaria manufatura no teknolojia 4, dezeñu manufatura 4, fizioterápia 4, tékniku eletrónika 4, no siénsia mariña 6.
Bolsu referidu hahú ona loke rejistrasaun iha loron18 Fevereiru to'o 06 Marsu.
Rejistu bele halo liu husi online FDCH.gov.tl no prepara mós fatin iha FDCH hodi atende karik aplikante via online mak hetan difikuldade ruma iha prosesu rejistrasaun.
“Hahú horisehik to'o ohin loron FDCH rejistu hamutuk 17, tanba horisehik loron feriadu nune'e foin mak to'o 17," katak nia.
Enkuantu, aplikante bolsu estudu FDCH, Joãozinho de Sousa Belo, agradese ba FDCH, tanba disponibiliza ona bolsa estudu ba Timor-oan sira atu ba estuda iha rai liur.
"Ba ha'u sente orgullu tanba fundu ne'e rasik disponibiliza ona materia sira, liu-liu ekipamentu hanesan komputer atu fasilita hodi halo aplikasaun," katak nia.
Joãozinho dehan, nia parte aplika ba grau mestradu ho area estudu lian portugés. Maibe atu liu ka lae ne’e ekipa juri mak sei determina
Editor: Jorgino dos Santos