Diretór Ezekutivu Fundu Kapital Humanu (FDCH), Júlio Aparício hateten, tinan ne'e iha programa bolsu estudu ba área prioridade tuir programa governu nian.

Nia informa, hato'o ba publiku liu-liu joven sira hodi partisipa prosesu selesaun ba bolsu estudu ba tinan ne'e.

"Area prioridade ba tinan ne'e aprova husi Konsellu administrasaun FDCH, ne'ebe prioridade liu ba área direitu, enjenaria, edukasaun, agrikultura no saude," dehan Júlio, iha knaar fatin, Kolmera-Dili, Sesta (2/5).

Nia dehan, boslu por meritu ne'ebé FDCH loke prioridade liu ba mellor kualifikadu husi munisipiu hotu, ne'e hatudu katak iha balansu ba bolsu por meritu, ba mellor kualifikadu ne'ebé tinan kotuk FDCH halo sosializasaun ba munisipiu hotu.

"Dadus ba mellor kualifikadu kuaze liu 400 ne'ebé selesionadu, ba universidade ATMI hala'o ona, mai husi mellor kualifikadu, maibe tanba ezijensia husi ATMI ne'e matematika minimu tenke 8.5, entaun ami hili mellor kualifikadu husi munisipiu iha ema nai'n 50, ne'ebé tuir teste, teste saúde, eskrita no oral no mos  ekipa halo avaliasaun mai husi akademiku enjiñaria mekanika Industrial, nune'e nai'n 15 tuir ona teste iha 22 Abril no selesionadu," dehan Julio.

Nia hatutan, dadus ne'ebe husi 2011 to'o agora área siensia sosiais barak liu, entaun tinan ne'e fo prioridade ba area ne'ebe importante, nune'e estudante sira ne'e fila mai sira bele kontribui ba kreximentu ekonomia ba área sira ne'ebe iha ona.

Bazeia ba dadus FDCH husi 2011 to'o mai agora 80% servisu no 5% mak eskola la hotu, balun ba servisu iha rai-liur, maibe husi dadus ne'ebe iha maioria funsionariu publiku sira, dosente sira mak ba eskola, entaun maioria mai fali hotu-hotu servisu, no sira ne'ebe gradua tiha ona ema nai'n 5.960 no sira ne'ebe sei ativu to'o 2025 hamutuk ema nai'n 4 700.

Nia relata, sira ne'ebe agora atu haruka ba eskola, servisu hamutuk ona ho instituisaun sira, nune'e halo kontratadu katak fila mai tenke servisu no halo konkordansia ona ho instituisaun sira, ANATL, MTC, MS, MF no instituisaun seluk.