Mate-isin Otelio Ote sai hosi Aeroportu rota Sandalo Oe-kusse haleu tuku 8:00 dadeer, akompaña husi familia sira inklui jornalista balun.
Tuir observasaun Jornalista online INDEPENDENTE terenu katak Mate-isin Jornalista Seniór Otelio Ote to'o iha Aeroportu Internasionál Prezidente Nikolau Lobato haleu tuku 12:00 Otl ho aviaun saude nian ho marka VH-MAF ne'ebé apoiu husi Ministériu Saúde ne'ebé kolobora ho Sekretáriu Estadu Komunikasaun Sosiál.
Bainhira to'o, mate-isin Otelio Ote tula kedas iha karru funerariu husi Ministériu Soliedariedade Sosiál no inkluzaun.
Bainhira mate-isin Otelio Ote to'o, Familia, jornalista no kolega sira hot-hotu ho sentidu onra hakruuk simu ho matan-been, ida-idak expresa sai sira-nia sentimentu tristeza, tanba sente lakon Aman, Maun no metre bo'ot ida, iha sira nia leet no iha mundu jornalismu ne'ebé husik hela ninia obra lubuk ida.
Tuir orariu, Mate-isin Jornalista Seniór Otelio Ote sei lori ba edifisiu média TVE nu'udar fatin ne'ebé antes ne'e saudozu hala'o servisu hanesan Xefe Redasaun.
Nune'e mós, sei liu ba iha Konsellu Imprensa Kintal Bo'ot hanesan fatin ida ne'ebé uluk nia hala'o servisu hanesan Eis Prezidente Konsellu Imprensa.
Kontinua fali ba iha Timor-Post hanesan fatin ida ne'ebé nia hala'o servisu hanesan Fundador ba média.
Hafoin hotu, mate-isin sei lori ba ninia rezidénsia iha Fomentu I deskansa ikus hafoin hala’o funebre tuir kultura Timor nian.
Molok mate-isin Otelio Ote sai husi Aeroportu Rota Sandalo Oe-kusse, jornalista sira husi media oin-oin iha Timor-LeSte hamutuk ho SEKomS, Konsellu Imprensa no Asosiasaun Jornalista inklui jornalista senior sira marka prezensa iha Aeroportu Internasional Prezidente Nikolau Lobato Komoro hodi Kadaver Otelio Ote nian.
Aliende ne’e, matebian mós simu husi familia sira no deputadu balun no maioria simu husi komunidade jornalista sira inklui estudante sira husi TVE no seluk tan.
Enkuantu, Saudozu Otelio Ote hakotu iis iha Hospital referal Oe-kusse iha loron 28 Abril 2026, haleu tuku 3:00 Otl madrugada kauza hosi moras komplikadu.
“Ita nia belun, ita maun to'o ona iha Dili, mai ita akompaña rai iha nia hela fatin nia horik ba no hela ba, durante nia halao nia jornada moris liu-liu iha Mundu jornalismu. Ita nia belun husik hela ita, ita hato sentidu kondelensia, mai ita hotu akompaña to'o nia fatin deskansa ikus nian, obrigadu barak maun Ote, ‘O nia naran ami sei naran ami sei la haluha,” Expresa sai husi SEKOMS, Expedito Dias Ximenes, bainhira simu mate-isin Jornalista senior Otelio Ote, iha Aeroportu Internasional Prezidente Nikolau Lobatu, Komoro, Kuarta (29/04).