Print this page

Familia Afetadu 30 Iha Hera Fila Hikás Ona Ba Hela Fatin Featured

By Flora Alves Abril 23, 2021 1006
Diretór Jerál Protesaun Sivil (SEPS), Ismail da Costa Babo, entrega hela manta ba xefe famili afeitadu iha Hera, (23/4). Foto Flora Alves/Independente. Diretór Jerál Protesaun Sivil (SEPS), Ismail da Costa Babo, entrega hela manta ba xefe famili afeitadu iha Hera, (23/4). Foto Flora Alves/Independente.

DILI:Husi familia uma kain hamutuk 75 ne’ebé evakua ba Semináriu Sagrada Coração de Jesus Hera,  sesta ohin (23/4),  uma kain 30 mak fila hikás ona ba sira nia hela fatin.

Familia hirak ne’e evakua ba Semináriu Sagrada Coração de Jesus Hera, tanba hetan dezastre naturál husi inundasaun impaktu husi udan no anin boot iha loron 4 fulan-Abril 2021.

Diretór Semináriu Sagrada Coração de Jesus Hera, Amu Reverendismu Nivio Correa Levre FDC hateten, fatin seminarista Sagrada Coração de Jesus Hera ne’e halibur uma kain hamutuk 75, no total ema na’in 585, mai husi bairo rua, kampung baru ho Bedik, hafoin akontesimentu dezastre naturál.

“Bainhira lori sira husi hela fatin mai iha seminariu ne’e, ha’u nia seminarista sira tein kedas sasoro no supermi hodi fó han sira ho sira nia oan komesa dadersan to’o lokraik,”dehan Amu Reverendismu Nivio ba jornalista, iha ambitu seremonia re-integra familia afeitadu, iha seminariu Sagrada Coração de Jesus Hera, Sesta (23/04).

Nia esklarese katak, familia hirak ne’ebé ohin fila ba hela fatin, kondisaun uma di’ak hela, sasan de’it mak hetan estragus total.

Tanba ne’e, sira ba hamos uma no hadia fali sasan balun no ohin entrega ba Governu lori fila ba sira nia hela fatin.

Familia ne’ebé sei nafatin iha fatin evakuasaun hamutuk 45, sira ne’e uma hetan estragus total.

“Iha fatin ida ne’e iha ema barak, labarik balu inan isin rua mai foin partus iha ne’e, maluk balu alezadu, balu kondisaun sei isin rua hela,”dehan Amu.

Iha fatin hanesan Diretór Jerál Protesaun Sivil (SEPS), Ismail da Costa Babo hatutan, iha uma kain 75 no ohin uma kain 30 mak lori fila ba sira nia hela fatin.

Entretantu SEPS fahe mós apoiu emerjensia ba familia uma kain ne’ebé fila hikás ona ba hela fatin.

Kada uma kain hetan fos karon ida, mina litru 3, superme kaixa ida, manta ida, ikan sardine lata 10, no sasan roupa sira seluk.

Babo espera katak, apoiu hirak ne’e bele ajuda to’o situasaun rekupera fali.

Entretanto, tuir dadus husi Ministériu Adminiatrasaun Estatal (MAE) relata katak, familia uma kain sira ne’ebé afetadu ba inundasaun iha teritoriu Timor laran tomak hamutuk rihun 28.734.

Entre munisipiu sira, iha Dili uma kain rihun 25.881, munisipiu Lautem 80, Aileu 167,  Ainaro 301, Baucau 90, Vikeke 472,  Kovalima 120,  Bobonaro 156,  Likisa 427, Ermera 92, Manatuto 441, Manufahi 114 no Oecuse 393.

 

Jornalista: Flora Alves

Editor: Jose Sarito Amaral

Rate this item
(0 votes)