"Objetivu husi atvidade konsulta saúde espesializa refere parte ida atu lori saúde besik ba komunidade sira iha área rurál ne'ebé difisil atu asesu ba saúde," haktuir komunikadu ne’ebé INPEPENDENTE asesu, Sesta (08/08).

Enkuantu, atividade fo asisténsia Saúde ba iha komunidade Suku Namanei ne'e hola parte iha komemorasaun loron FALINTIL nian ba tinan 50.

Nune'e FALINTIL-FDTL koordena ho Ministéiru Saúde liu-husi Sentru Saúde sira iha munisípiu  hodi fó tratamentu saúde espesializada ba komunidade sira mak hanesan ruin, ibun, tilun, matan no mós inan isin rua no moras sira seluk tan.

Prezidente Autoridade Postu Administrativu Quelicai Antigu, Francisco Matias Gusmão hatete, nia parte agradese ba programa Civil Militar Coperasaun (CIMIC) ne'ebé lori saúde besik ba komunidade  suku Namanei.

"Hanesan Autoridade postu administrativu agradese ba servisu Saúde Munisipál ho Saúde husi F-FDTL hotu hatudu sira nia sentidu pertense ba rai no povu ida ne'e, ohin bele halo konsulta espesializada hodi festeza Ezisténsia loron FALINTIL ba dala-50," nia apresia.

Nune'e mos, Veteranu João Cancio Filipe no Komunidade Alexandrina Epifania da Silva Filipe senti kontenti ho prezensa pesoál saúde no médiku espesialista iha suku ne’e, tanba fasilita ona tratamentu ba sira nia saúde.

"Doutor espesialista sira mai iha ne'e (Namanei) ha’u agradese tebes tamba ami presiza saúde diak, ami hein iha uma sira mak mai de'it, ami orgullu tebtebes saúde sira nia tulun ba ami populasaun ne'ebé susar asesu fasilidade saúde tamba dook," afirma veternu João Cancio Filipe.

Enkuantu, konsulta espesializada ne'e hala'o iha sede Suku Namanei, médiku husi Ministériu Saúde no FALINTIL Forsa Defeza Timor-Leste (F-FDTL), komunidade ne'ebé asesu ba asistensia saúde ne'e maka komunidade suku Namanei.

Entretantu, Suku Namanei iha aldeia ha'at hanesan Cirilaco, Daicou, Loirae, Ua-Sufa, ho totál populasaun 2.115 no totál komunidade ne'ebé halo tratamentu hamutuk 270.