Print this page
Ministra Saude, Odete Maria Freitas Belo ho Embaxador EUA, Kevin Blackstone, kua hela fita nudar simblu inaugurasaun postu saude KadaBunak. Foto Media EUA. Ministra Saude, Odete Maria Freitas Belo ho Embaxador EUA, Kevin Blackstone, kua hela fita nudar simblu inaugurasaun postu saude KadaBunak. Foto Media EUA.

EUA-MS Inaugura Postu Saúde Kada Bunak Featured

DILI:Governu Estadus Unidus Amerika (EUA), liu husi Emabixadór ba Timor-Leste, hamutuk ho Ministériu Saúde, ohin (21/05) hala’o serimonia inagurasaun ba postu saúde Kada Bunak iha Aldeia Namalai, suku Camea, postu Administrativu Cristo Rei.

Reabilitasaun ba postu saúde ne’e realiza ho fundu husi Forsa Naval EUA ho montante dolar amerikanu $152,839 no postu saude ne’e sei benefisia rezidente liu 5,000 iha suku lima.

Embaixadór EUA ba Timor-Leste Kevin Blackstone, agradese kontrator Timoroan na’in sia ne’ebé kontribui sira nia matenek ba projetu ida ne’e.

Ekipa ne’e konstrui sala farmasia, sala konsulta maternidade, sala konsulta jeral no sala laboratóriu. Sira mos troka uma ninia kakuluk, tau azulejiu foun, foru, hadiak janela no instala tangki be’e litru 5,000.

“Ha’u orgullu tebes ho servisu ne’ebé hala’o ona liu husi parseria entre Estadus Unidus no Timor-Leste,”Embaixador Kevin Blackstone hateten.

“Hanesan imi hotu hatene, Forsa Naval EUA kuñesidu iha Timor-Leste tanba sira nia servisu ne’ebé kualidade iha konstrusaun sala eskola no postu saude sira durante tinan sanulu nia laran. Ami orgullu atu kombinasaun matenek husi Forsa Naval EUA no esperiensia komprovada husi kompañia lokal sira hodi habo’ot kapasidade setor saude nian iha nasaun ne’e. Traballador lokal ne’ebé profesional fo sira nia domin no klamar ba projetu ne’e hodi servisu oras naruk durante tempu Covid-19 nian hodi asegura postu saude ne’e bele finaliza ho didiak no exelente. Ami haksolok bele kontribui ba setor saude no mos ekonomia lokal.”

Entretantu iha fatin hanesan, Ministra Saúde, Odete Maria Freitas Belo hatete, komunidade sira ne’ebé atu asesu ba iha postu saúde Kada Bunak hamutuk rihun lima resin, husi Aldeia Karau-Mate, Darlau, Buburlau, Namalai no Kaisabe, ne’ebé pertensia ba Suku Camea nian.

“Lori Ministériu Saúde nia naran ha’u hakarak atu hatete katak ita kontente, tanba postu ne’e iha tiha ona iha tinn 2016, ho apoiu komunidade ou nasaun Amerika nian ita haree katak sira hadi’a postu ida-ne’e sira kompleta tan fatin ba farmasia nian, konsulta ba labarik, konsulta ba inan isin rua, sala partus nomós fatin atendimentu ba kazu emerjénsia sira,”Ministra hateten.

Fundu Forsa Nala EUA nian ba projetu ida ne’e parte ida husi Estadus Unidus ninia fundu apoiu umanitária no programa kapasitasaun ba responde dezastre iha Timor-Leste.

Prezidente Munisípiu Dili Gaspar Soares no Xefe Suku Camea, Matos da Costa partisipa iha serimónia inaugurasaun Postu Saúde Kda Bunak iha loron 21 Maiu 2021 lokaliza iha Postu Administrativu Cristo Rei.

 

Asistente Editor: saturnina da Costa

Read 648 times Last modified on Sexta, 21 Maiu 2021 19:05
Rate this item
(0 votes)