Tuir Diretór Eskola Ensino 3⁰ siklu Kristal Fernando Mesquita hateten, ezame  pasajen klase ba estudante setimu ano no oitavu ano, remata ona.

Nune’e, iha estudante na’in 231 maka partisipa ona iha ezame pasajen klase nian, enkuantu, ba estudante 7⁰ano no 8⁰ ano ne’ebé seidauk partisipa, eskola sei fó oportunidade ba sira atu tuir hikas ezame segunda xamada nian.

"Kona-ba estudante hira ne’ebé maka seidauk tuir ezame, tanba moras no  iha difikuldade balun ne’ebé maka sira hato’o mai eskola, entaun ami prontu fó fali ezame ba sira iha segunda xamada nia  iha semana oin (semana ne’e)”, dehan nia ba Online INDEPENDENTE, iha nia knar fatin, sesta (21/11).

Nia hatutan, estudante hirak ne’ebé  durante ne’e falta ka la iha prezensa ne’ebé la dun  masimu iha eskola, ekola mós iha dever, antes ne’e haruka ona xamada  ba inan-aman, tanba iha eskola  aula normal ne’e sempre hare ba iha estudante sira nia prezensa.

“Entaun fó xamada ba inan-aman liu hosi karta xamada ou bele mós oralmente hato’o ba sira, sira bolu inan-aman mai hasoru iha eskola oinsá mak sira nia oan bele ativu fali ba iha aula depois tuir ezame pasajen nian", nia relata.

Entretantu, ba ezama nasional nian, iha eskola refere, iha estudante 90 ano, ne’ebé la partisipa ezame nasional hamutuk na’in 4, kompostu husi mane na’in rua no feto na’in rua, husi total estudante 90 ano na’in 113.

Enkuantu, iha eskola refere, total profesores hamutuk na’in 25, kompostu husi mane na’in 12 no feto na’in 13, inklui seguransa eskola na’in ida.