Print this page

Estudante Balun mai husi Xina La Tama Fatin Izolamentu Featured

By Pedro Alves Fevereiru 06, 2020 1933
Fatin izolamentu iha HNGV Fatin izolamentu iha HNGV

DILI: Hafoin virus corona sai kazu global, nasaun hotu-hotu iha mundu, inklui Timor Leste, hahú halo asaun prevensaun liu husi teste no izola ema ne'ebé foin fila husi rai li'ur, liu-liu mai husi Xina.

Maibé, tuir informasaun, sidadaun Timor Leste balun ne'ebé foin fila husi Xina la halo teste mediku.

"Timor-oan ne'ebé mak rona informasaun katak mai husi Xina fila mai halai ba liu uma, favor ida ba aprezenta aan iha ministeriu saúde ho ospital hodi tama fatin izolamentu no observasaun nian tanba perigoju tebtebes, tanba sira mai nonok-nonok la hatene sira moras iha ka laiha, liga ba ema seluk moras ona mak foin hatene,” informa Ministru Negosiu Estranjeiru no Kooperasaun (MNEK) Dionisio Babo hafoin hasoru Primeiru Ministru Taur Matan Ruak iha palasiu governu, Segunda (03/02).

Nia dehan, tuir informasaun ne'ebé nia simu iha Timor-oan balun fila mai no ba direitamente familia.

Tan ne'e, nia apela ba see de'it ne'ebé mai husi nasaun Xina atu tenke aprezenta aan ba MS hodi bele halo teste.

Entertantu, hatan kona-ba desizaun bandu sidadaun Xina tama TL, Dionisio dehan, seidauk iha desizaun atu bandu sidadaun Xina tama TL.

Kona-ba situasaun ikus estudante sira iha li'ur no sidadaun sira, nia dehan, governu sei esforsu hodi lori fila.

“Ita sei esforsu lori ita-nia estudante sira ne’e mai, ita sei halo kontaktu ho nasaun seluk, karik nasaun Xina disponivel bele lori ita-nia estudante sira ne’e mai  ou sai,” katak nia.

Rate this item
(0 votes)