Xefe Governu hatete, kargu ba Vise Ministra ne’e mamuk kuaze fulan ida tanba nia koko atu koalia ho eis Vise MF, Felicia Carvalho, maibé nia insiste hodi kontinua rezigna an.

"Ha'u tenta ko'alia ho Felícia Carvalho, nia dehan ‘la'e, ha'u sente aan, dehan labele ne'e mak ha'u husu demisaun ne'e, ne'ebé ha'u fiar katak Vise Ministra Finansas foun, Regina de Jesus sei servisu ho di'ak’,” dehan PM Xanana iha bainhira akompaña posse ba Vise MF foun, iha Palasiu Prezidensia Repúblika, Kinta (12/02).

Xanana dehan, nia fiar katak Vise MF foun ne’ebé molok ne’e asume kargu nu’udar Direitora Jerál Tezouru, ne’e kompetente no responsavel.

Xefe Governu hatutan, tanba governu dasia iha prosesu atu hadia sistema finanseiru ne'ebé governu kria hodi muda sistema uluk, nune’e fó fiar ba Ministra ho nia Vise hodi hala’o servisu refere.

"Vise Ministra Finansas servisu ho di'ak, Ministra servisu ho di'ak, koordena ba malu, fó servisu ba malu, hadia, bainhira ita hotu, ita-nia mandatu sistema finanseiru tenke la'o di'ak," dehan Xanana.

Prezidente Repúblika, José Ramos Horta fó posse ba Regina de Jesus de Sousa nu’udar Vise Ministra Finansas foun.Nomeasaun ne’e formaliza tuir Dekretu Prezidente Repúblika Nú. 17/2026.

Regina nu’udar espesialista finansas ho esperiénsia liu tinan 20. Nia lori koñesimentu tékniku nivel aas iha Jestaun Finansas Públikas ba nia pozisaun foun. Nu’udar eis-Diretora Jerál Tezouru, nia sai instrumentál hodi asegura integridade, efisiénsia, no transparénsia ba sistema finanseiru estadu nian.

Tanba, ninia lideransa kobre área estratéjiku sira inklui kontabilidade nasionál, operasaun tezouru nian, ezekusaun orsamentál, no jestaun pagamentu, ne’ebé diretamente apoia polítika governu no reforma Jestaun Finansas Públikas.

Regina koñesidu ho nia abilidade analítika no koñesimentu konformidade.Nia iha istória forte ida kona-ba harii ekipa, promove kooperasaun entre ajénsia sira, no fó konsellu ba órgaun estadu sira kona-ba asuntu orsamentál sira.

Vise MF foun ne’e esperiénsia aumenta ona liu husi formasaun internasionál avansadu ho FMI no ADB, ne’ebé foka ba modernizasaun tezouru, sustentabilidade dívida, no polítika fiskál.

“Ha’u iha konfiansa tomak katak, Regina de Jesus de Sousa sei lori nia perísia esepsionál, integridade ne’ebé metin, no kompromisu kle’an ba servisu públiku ba papél vital ida ne’e.”

“Ninia lideransa sei sai krusiál hodi promove estabilidade ekonómika ita-nia nasaun nian, garante disiplina fiskál, no reforsa fundasaun governasaun di’ak ba benefísiu povu Timor-oan tomak nian," dehan PR Horta.

Entretantu, Regina troka Felícia Claudinanda da Cruz Carvalho, ne'ebé aprezenta nia karta rezignasaun iha 14 Janeiru 2026, ba Primeiru Ministru, Kay Rala Xanana Gusmão.

Tuir informasaun ne’ebé Jornal Independente hetan, rezignasaun ne’e iha relasaun ho diferensa hanoin entre Felícia ho Ministra Finansas kona-ba diresaun polítika no programa sira iha Ministériu Finansas.