Diretór Eskola Sekundaria Jerál 4 de Setembru, Balide, Sergio A. da Cruz hatete, total estudante desimu segundu anu ne’ebé atu tuir ezame nasionál hamutuk na’in 1.037.
Nia dehan, husi numeru ne’e, kompostu husi Estudante Siensia no Teknolojia (CT) hamutuk 467, ne’ebé fahe ba mane na’in 165 no feto na’in 302 no estudante husi Siensia Sosiais no Humanidade (CSH) hamutuk 570, ne’ebé fahe ba mane na’in 318 no feto 252.
“Kona ba sala de aula ba estudante sira atu hala’o ezame preparadu ona no mós fotografia no kartaun ba estudante sira mós preparadu ona,”dehan nia ba Jornalista Online INDEPENDENTE, iha nia knar fatin, ESG 04 Setembru UNAMET, Balide, Dili, (02/10/25).
Nia hatutan, aliende ne’e, kartaun ba professor sira atu uza hala’o vizilansia ba iha ezame nasional nian mós preparadu ona.
“Kona ba sala de aula, ha’u rasik hamutuk ho Adjuntu Diretór no Gabinete Apoiu Tekniku (GAT), ami komunika malu hela, bainhira parte administrasaun prepara sala de aula ba estudante sira atu tuir ezame nasionál sufisiente,”tenik nia.
Iha biban ne’e, Dirijente eskola ne’e mós husu ba estudante sira atu prepara-aan didiak hodi partisipa iha ezame nasional.
Nune’e mós husu ba inan-aman sira atu kuidadu no kontrola oan sira atu labele ransu livre hodi hamosu violensia.
“Husu ba inan aman sira atu kontrola oan sira halo di’ak no husu mós ba estudante sira kontrola sira nia-an no hadok-an husi buat ida ransu ne’e, tanba bu’at ida violensia ne’e tanba ransu ho ema ne’ebé sala, mak ita sei monu ba dalan ne’ebé sala, ho nune’e husu ba estudante sira estuda iha uma no prepara-aan atu bele tuir ezame nasionál ne’e ho di’ak, importante liu mak husu ba inan aman sira kontrola nafatin oan sira,” tenik Diretór eskola.
Entretantu, total profesores ne’ebé mak hanorin iha Eskola Sekundaria Jerál 04 de Setembru UNAMET, Balide, Dili, hamutuk na’in 77 kompostu husi mane na’in 40 no feto na’in 37.
Enkuantu, total estudante sira ne’ebé atu tuir ezame nasional iha teritoriu nasional hamutuk na’in 55.902. Husi numeru ne’e, kompostu husi estudante ensinu báziku na’in 26.747, ensino sekundáriu jerál hamutuk 25.012, ensinu tekníku vokasionál hamutuk na’in 3.717 no mós programa nasionál ekivalénsia ensino báziku hamutuk 427.