Iha kontestu despedida ofisiál, Embaixadór Okto, akompaña husi nia espoza, hasoru malu ho Primeiru Ministru, Kay Rala Xanana Gusmão, iha Palásiu Governu, Dili, iha Kinta (19/03).

“Ohin loraik ne’e, ha’u hasoru Primeiru Ministru Xanana Gusmão hodi despedida ikus kona-ba ami-nia amizade durante tinan haat-resin iha Timor-Leste. Ha’u sei ba kontinua fali ha’u-nia misaun iha Papua Nova Giné iha tempu badak,” dehan Embaixadór.

Nia hatete, esperiénsia servisu iha Timor-Leste sai memorável tebes, tanba povu Timor-Leste no komunidade sira simu nia ho di’ak tebes.

Embaixadór ne’e mós subliña, atmosfera dame no kooperativu iha rai ne’e halo nia sente besik no lahaluha Timor-Leste.

Durante nia mandatu, Embaixadór destaka katak relasaun entre Indonézia no Timor-Leste hetan progresu signifikativu liu husi kooperasaun oioin iha área polítika, ekonomia, sosiál no kultura.Interasaun sosiál no investimentu husi setór privadu Indonézia mós sai parte importante husi dezenvolvimentu bilateral.

Kompaña Indonézia balun hanesan Bank Mandiri, BRI, Telkomsel no Wijaya Karya partisipa iha setór finanseiru, telekomunikasaun no infraestrutura iha Timor-Leste.

"Prezensa husi setór privadu Indonézia nian bele kontribui ekonomia. Sira la'ós hetan de'it lukru maibé kontribui konstrutivu nasaun nian," dehan nia.

Despedida ne’e marka rohan ida husi mandatu diplomátiku ne’ebé konsidera susesu, no fó sinal ba kontinuidade relasaun di’ak entre Timor-Leste no Indonézia iha futuru.

Entretantu, bainhira partisipa iha selebrasaun loron Eid Al-Fitr 1447H, iha Embaixada Repúblika Indonézia, Faról, Sesta (20/03), Primeiru Ministru, Kay Rala Xanana Gusmão, agradese ba Embaixadór Republika Indonezia iha TL, ne’ebé iha tempu badak sei husik TL hafoin ninia misaun iha nasaun ne’e remata.

Tuir PM Xanana, durante Embaixadór Okto ninia mandatu, nia halo esforsu boot tebes hodi hametin nafatin relasaun diplomatiku entre Indonezia ho TL.