“Tanba sirkunstánsia pesoál urjente, ha’u sei rezigna-an husi kargu Embaixadór no sei fila hikas ba Estadus Unidus iha inísiu fulan-Agostu ne’e. Onra ida ba ha’u, iha ha’u nia moris tomak mai servi hanesan Embaixadór EUA ba Timor-Leste no serbisu hamutuk ho funsionáriu dedikadu, profisionál husi Misaun EUA nian iha Timor-Leste,”dehan nia iha pajina ofisial EUA ne’ebé Online INDEPENDENTE asesu, segunda ohin.
Diplomata ne’e, konsidera laran di’ak Timor-oan sira nian impresiona, nune’e halo nia sei rai metin memoria barak ne’ebé nia hetan iha Timor-Leste.
“Ha’u sei rai metin memória barak ne’ebé ha’u hetan durante ha’u nia tempu iha ne’e. Ha’u sempre nafatin orgullu profundamente ho servisu Misaun EUA nian hodi hametin parseria importante no rohan laek no mós amizade entre Estadus Unidus no Timor-Leste.”tenik nia.
Entretantu, Embaixadór ne’e hala’o nia knar iha TL durante fulan hat nia laran, hahú husi fulan-Fevereiro to’o fulan-Agostus, tanba kauza situasaun familia.
Enkuantu, iha prosesu rezignasaun ne’e, Embaixadór aprezenta uluk nia karta ba rezignasaun ba Governu Amerika, hafoin aseita husi Governu sentral. Nune’e Embaixadór aprezenta hikas nia karta ba Prezidente Republika Francisco Guterres Lú-Olo no Primeiru Ministru Taur Matan Ruak.
Nune’e, Embaixadór sei fila ba Amerika iha loron 6 fulan-Agostus tinan ne’e.
Asistente Editor: Saturnina da Costa
