PR Lú Olo halo ona deklarasaun Estadu Emerjensia dala 15 iha 30 Juñu 2021 hafoin Parlamentu Nasionál fó autorizasaun. EE dala 15 nee hahú iha 2 Jullu no sei remata iha 31 Jullu 2021.
Prezidente Repúblika dekreta estadu emerjénsia hafoin pedidu estensaun aprova iha Parlamentu Nasionál. Molok nee, Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál nuudar dalan atu proteje saúde públika.
Tuir komunikadu neebé jornal INDEPENDENTE asesu iha Sesta (02/07), PR Lú Olo deklara haree ba númeru kazu Covid-19 neebé aumenta estadu kontinua foti medidas prevensaun no kombate kontájiu virus SAR-CoV-2. Estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika.
Timor-Leste rejista kazu ativu liu 800 ho total númeru akumuladu liu 9,000 dezde inísiu kazu dahuluk rejistadu iha Marsu 2020. Virus corona hamate ona ema hamutuk nain 24 asosiadu ho Covid-19 iha territóriu nasionál.
“Deklarasaun estadu emerjénsia sei abranje territóriu nasionál tomak. Estadu emerjénsia sei parsialmente suspende direitus ba sirkulasaun internasionál, liberdade sirkulasaun no fixasaun rezidénsia, direitu reuniaun no manifestasoins, liberdade ba kultu, direitu ba edukasaun no direitu propriedade, direitu ba rezisténsia, no inisiativa ekonómika privada,” deklara PR Lú Olo liu husi karta refere.
Nia hatutan, autoridades públikas kompetente sei impoin medidas importante hodi prevene importasaun estirpes foun SARS-CoV-2 ba territóriu nasionál no permite kontensaun no nia alastramentu entre populasaun liu husi dalan taka fronteira, bandu estranjeiru sira mai territóriu nasionál, estabelesimentu regras distansiamentu sosial, impozisaun ba obrigasaun halo teste, izolamentu ba pasiente infetadu, konfinamentu domisiliáriu no determinasaun serkas sanitária.
“Governu mak define medidas implementasaun ba estadu emerjénsia ba 15. Dezde fulan marsu 2020, hafoin rejista kazu konfirmadu ida ho SARS CoV-2, Timor-Leste implementa kedas estadu emerjénsia atu fó kbiit ba Governu atu foti medidas prevensaun no kontrolu hodi hasees sidadaun hotu-hotu husi kalamidade públika neebé bele mosu husi moras Covid-19.”
Entretantu, iha 30 Juñu 2021 deputadu sira iha PN autoriza Prezidente Repúblika dekreta Estadu Emerjensia. Pedidu renovasaun EE nee hetan aprovasaun ho a favor 39, kontra 0 no abstensaun 20.