“Ami sente lakon tebes, ami nia Aman lakon leet husi ami, tan ne'e ami povu aileba mai iha ne'e, tanba ami nia domin, tan ne'e mak ami mai leba ho ai-fuan ne'ebé ami fa'an loro-loron hodi oferesem,”  Dehan Aileba Rozalina Pereira de Jesus, hafoin presta omenajen no oferese ai-fuan, iha rezidénsia maktoban Eis Prezidente Repúblika, “Lú Olo”, Falor Dili, kinta (25/06).

Tuir negosiante aileba ne'e konsidera, Saudozu Lu-Olo hanesan Aman ne'ebe nia domin bo'ot tebes ba povu liu-liu Ai-leba sira, durante nia moris.

Nune'e, liu husi kariedade oferese ai-fuan ne'e hanesan aktu domin ida husi povu hanesan momentu ikus saudozu husik hela mundu.

Iha fatin hanesan, Ai-leba, Florinda dos Reis konsidera, Saudozu Lu-Olo hanesan ai-hun boot ida ba nasaun no povu, tanba ne'e Saudozu nia mate hanesan falun tristeza boot ida ba povu.

“Hadomi duni ami nia nai ulun hanesan ai-hun ida karik hamahon ami. Ami hanoin duni triste duni hotu. Ami mai ne'e inisitiva ami nian ami lori ai-fuan kariedade nian hanesan hadomi nia, ami mai de'it, ami la konta ida, ida ne'e kariedade nian hanesan liman karun fó liman los,”  Dehan nia.

Nia haktuir, hanesan negosiante aileba ne'ebé kada loron loron faan aifuan oi-oin iha fatin públiku no iha merkadu Taibesi sente sokadu tebes rona lider nasional saudozu Lu-Olo nia mate.

“Ami ai-leba iha Dili de'it loron-loron fa'an iha merkadu Taibesi. Ami rona Avo mate mak ami bolu malu mai. Ami bolu malu mai tanba hadomi ne'e, ita-nia aihun ida karik tohar ne'e ita tenki hakfodak mai ka, tanba ai-hun ne'e hamahon ita”, Nia espresa.

Molok Saudozu Lu-Olo nia rezidénsia hodi presta omenajen ikus, nia dehan, liu husi luta kiik oan ida mak buka mata-dalan oinsa mak lori sira to'o ba fatin maktoban nian.

“Ami mai hasoru mata-dalan sira mak lori ami mai. Entaun ohin ami tama ba hasoru hare direita avo nia isin mate no hasoru nia espoza no oan sira. Ami mai hanesan ne'e, ami sente kontente no triste dala ida, tanba ami nia aihun ida tohar, ami hakfodak no klamar semo, entaun ha'u ho oan mane sira mai iha ne'e, hodi fo omenajen no fó hela matak malirin mai ami, nia isin mak mate, mais nia espiritu nafatin akompaña ami,”  Nia hato’o.

Saudozu hanesan Aman ida ne'ebé luta husi ai-laran to'o ukun aan, tanba ne'e nia mate sira rona laran triste tebes. Tanba ne'e desde hori-kalan no ohin bolu malu mai deit presta omenajen ikus nian.

“Ai-fuan sira ne'e ami ida-idak inisitiva tau hamutuk mak ami lori mai, ami sira ohin mai ne'e maioria husi Munisipiu Aileu hotu, maibe balu mós husi Munisipiu seluk.  Horiseik la'o mai iha ne'e to'o hori-kalan to'o tuku 12 kalan mós ha'u sei iha ne'e nafatin, ha'u mai rona informasaun iha ne'e, husu dehan ‘o bele buka maluk aileba balu ka la'e, ne'e mak ha'u ba buka, entaun hori-kalan ha'u fila tuku 2 bá buka kedas maluk aileba sira,” Nia deklara.

Nune'e mós, Ai-leba, Manuel de Jesus konta saudozu Lu-Olo durante sei moris sempre hola nia modo no ai-fuan sira seluk.

 “Uluk iha Dili laran ne'e dudu Kerobak iha kapital Dili laran ne'e ha'u mesak mak dudu desde uluk 2006 ne'e Saudozu hela nia kraik no sira nia uma, ema babain la tama no dudu kerobak la tama, maibe ha'u rasik dudu modo tama ba iha laran uma, uluk prezidente sei hela iha kraik ne'eba ne'e”, Nia konta.

“Iha momentu ne'eba ha'u faan modo no lori modo tama ba iha laran, no saudozu dehan bá ha'u, aban-bainrua ami hela iha fatin seluk ‘o bele tuir ka la'e ha'u dehan bele. To'o ikus mai Prezidente sira hela fali mai iha uma falor ne'e, no ha'u la'o husu tuir fali kolega sira Prezidente hela iha ne'ebé no sira dehan hela iha fatin ne'e, entaun ha'u mai buka, tanba langanan diak ne'e, ha'u laran metin mak ne'e ona no ha'u ho bisikleta buka hetan fatin ne'e no dader ha'u lori gerobak mai dudu tama kedas ba iha dapur laran no Prezidente hola modo sira ne'e hotu kedas,” Manuel haktuir.

“Ha'u halo langganan ho Prezidente tinan rua hanesan ne'e uluk dudu  kerobak tama ba laran no to'o ikus mai ha'u moras deskansa tiha ha'u la jadi mai faan ona modo ha'u para tiha no Prezidente nia nomor kontaktu mós laiha ona no sikuriti mós foun hotu ona no balu la konese ha'u ona. No ha'u dehan ba sira se imi la koñese ona ha'u bolu tok Prezidente ho ferik koñese ha'u ka la'e tanba ha'u faan modo iha ne'e”,  katak Manuel.

Maibe ikus mai rona husi kolega sira katak, Prezidente Lu Olo mate, entaun sasan sira ne'e mós ha'u fa’an la kontente ona,  tanba atu hetan ema di'ak hanesan katuas no ferik ne'e laiha ona.

“Iha Timor laran ne'e laiha ema ida mak bolu ha'u ba langganan ho Prezidente,  Prezidente kala hadomi duni ha'u, ha'u aileba ba langganan ne'e, bele dudu kerobak ida fo'er ne'e bele tama to'o laran dapur nian. Ha'u dala-ruma tama ba dapur Prezidente halimar ho labarik no nia fen prepara kafe ba ha'u hemu”, nia informa.

Nia mós konta, tuir nia hatete Saudozu Lu-Olo la sosa modo iha merkadu ka supermerkadu sira, maibé sosa de'it modo iha nia ne'ebé sai hanesan langganan di'ak.