"Tasi-tolu fatin ida ne'ebé furak, no fatin ida ne'ebé riku tebes ho valores istóriku, valores kulturais liu-liu valor espriritual,” dehan Dom Virgilio Cardeal Do Carmo da Silva hafoin remata prezide misa agradeseimentu tinan ida vizita Sua Santidade Papa Francisco nia iha Timor-Leste ne'ebé hala'o iha Tasi-Tolu, Kuarta (10/09).
Kardeál hatutan, eventu istóriku iha vizita dahuluk Santu Papa João Paulo II, konsege lori istória foun ba Timor-Leste ba luta ukun rasik-aan no sai nasaun ida livre no soberanu.
“Eventu istóriku ba dala-uluk mak Papa João II nia vizita iha tinan 1989 , hatudu ba mundu tomak katak povu Timor Povu fiar nain, povu ne'ebé únidu hatene luta hamutuk iha auto determinasaun, Papa husik hela lia menon furak ba ninia emar sira “imi mka masin rai nian, imi mak roman mundu nian”, Dom Virgilio haktuir.
Lider Igreja Katólika Timor-Leste ne’e afirma liu tan, eventu istóriku daruak mak Papa Francisco nia vizita mai rai Timor iha loron 9 to’o 11 fulan-Setembro tinan 2024.
Iha ne'ebé Timor dala ida tan hatudu ba mundu katak rai kiik ida ne’e, iha roman fiar katólika ne’ebé nabilan iha kontinente Aziátiku nian.
Bispo Dom Virgilio relembra fali katak, Papa Francisco hare hetan roman relijaun, kultura no toman sira iha timoroan sira nia fuan, iha labarik sira, foinsa’e sira no mós katuas ferik sira.
“Vizita ne’e hatudu duni katak Maromak hanoin no haraik bensaun mai ita, liu husi prezensa fraterna Papa Francisco ninian. Nia mai hametin timoroan nia fiar ba Maromak, haboot esperansa ba loron aban ho haburas karidade ba malu.
Papa Francisco, iha loron ne'ebé timoroan hanoin Papa nia vizita mai iha rai Timor-Leste husu harohan nafatin mai Timoroan sira, atu moris únidu, unidade no fraternidade.
"Ohin ita hamutuk nudar porsaun kiik ida iha Maromak nian iha rai Timor hamutuk iha kreda iha hodi hasae ba Maromak santa Misa nu'udár asaun degrasa hodi selebra Primeiru aniversáriu Vizita Papa Francisco nian," kardeal hato'o.
Entretantu, altar Tasi-tolu maka Santu Papa na’in rua hasanto ho ninia sakrifisiu.
Relembra fali katak, Santo Papa João Paulo II vizita TL iha fulan-Outubru tinan 1989 no Santu Papa Francisco vizita TL iha loron 9-11 fulan-Setembru tinan 2024.