"Dívida ba ospitál rai-li'ur mai husi oitavu governu tokon US$ 32, ne'e labele hasai hotu kedas iha tinan ida. Ko'alia ho ospitál sira ne'ebé konkorda malu, selu oituan oituan. Aat liu fali mak simu sira-nia dokumentu husi ne'ebá mai dokumentu falsu barak, ami haruka fila-fali ba sira rekoñese katak ne'e sala duni, ne'e mak selu neineik," dehan nia, iha Parlamentu Nasionál, horisehik.

PM adianta, dívida hirak-ne'e selu hotu ona maka tokon US$ $10, ne'ebé sei selu tan iha tinan ida-ne'e.

Iha sorin seluk, Ministra Saúde, Elia dos Reis Amaral hateten, dívida hirak-ne'e husik hela husi governu anterior sira no sei selu fazeadamente.

"Dívida ne'e ita selu neineik no selu ho kuidadu tanba ami deteta katak iha MoU balun ke ha'u labele mensiona iha ospitál ne'ebé, maibé ami deteta katak iha klauzula balun hatete katak 5% jurus, ita la hatene sé mak simu no osan ne'e ba ne'ebé ita la hatene, ho nune'e mak ho resivu pasiente sira ne'ebé mai ami haree ho kuidadu ami analiza depois ami halo pagamentu, totál osan maizumenus sei to'o tokon US$ 38, ne'e osan barak tebes entaun ami sei selu ho enfazeadamente," dehan nia.