Diretór Edukasaun Munisipiu Ainaro, Patricio da Costa Magno hatete, kondisaun edifísiu eskola no fasilidade la suporta prosesu ensinu aprendizajen, tanba ne’e nia parte daudaun ne’e buka hela solusaun.
Diretór ne’e dehan, eskola Dugau ne’ebé harii husi komunidade sira iha tinan 2018 hasoru duni kondisaun ne’ebé grave.
"Loos duni, realidade ita haree estudante sira tuur iha rai no mós kondisaun edifisiu eskola ne'e rasik la favoravel ba estudante atu aprende, tan ne'e edukasaun munisipiu esforsu hela atu rezolve problema ida ne'e," dehan Patricio ba jornalista Jornal INDEPEDENTE, iha Ginaziu Dili, Sabadu (28/02).
Daudaun ne'e, nia informa, ekipa tekniku halo ona leventamentu dadus ba eskola referidu atu bele hato'o baMinistériu Edukasaun hodi bele tau ba prioridade.
"Ami-nia tekniku sira ba sukat ona rai, maibé eskola ne'e estatutu rai seidauk loos, tan ne'e ami presiza komunidade no autoridade lokal sira atu hato'o deklarasaun mai edukasaun munisipiu. Nune'e bainhira tama ba konstrusaun labele mosu dezentendimentu. Tanba referensia balun ita tau tiha osan atu ba konstrui, komunidade la fó rai," katak nia.
Aleinde ne'e, Diretór ne’e dehan, kondisaun ne’ebé hanesan akontese mós iha EBF Mota-Ulun.
"Eskola rua mak ami identifika kondisaun la di'ak, hanesan EBF Mota-Ulun no mos klase paralelu Dugau. Ita sei ko'alia ho ministeriu oinsa bele ajuda sira-nia kondisaun, maibé ita tau ona ba planu 2027, tanba 2026 ita iha de'it prioridade ba eskola lima," katak nia.
Kona-ba orsamentu kontrusaun, nia dehan, sei haree ba kondisaun rai.Se rai tetuk orsamentu tuun, maibé se la tetuk, orsamentu sa’e.
"Tanba tuir ami-nia esperiensia, bainhiraMinisteriu Edukasaun konstrui sala de aula tolu inklui eskritoriu, kuziña merenda eskolár no toilet, orsamentu hamutuk rihun $180," katak nia.
Molok ne’e, iha 19 Fevereiru, hafoin Jonal INDEPENDENTE públika notisia kona-ba kondisaun eskola iha Dugau, Ministériu Edukasaun liu husi ninia pajina Facebook ofisial, hatete katak informasaun kona-ba kondisaun eskola aat ne’e la loos.
“Relasiona ho notisia ne’ebé públika sai husi Jornal INDEPENDENTE iha loron 19/02/2026 kona-ba klase paralela Dugau husi EBF 1.2 ne’ebé fó sai katak eskola refere ‘estuda iha eskola aat’ ne’e la loos tanba eskola refere nia kondisaun sei bele uza, maske didin de’it ho kalen,” dehan ME.
Maske nune’e, ME hatete tan, hafoin haree notisia ne’e, ekipa téknika husi Gabinete Relasaun Públika no Protokolu halo kedas kontatu ho Superintendente no Diretór Serbisu Edukasaun Munisipál Ainaro hodi hetan informasaun.
Tuir informasaun ne’ebé fó katak eskola refere harii husi komunidade sira atu fasilita estudante sira-nia prosesu aprendizajen, tanb aestudante balun ne’ebé hela dook husi eskola EBF 1.2.
Serbisu Edukasaun Munisípiu Ainaro informa ona mós ba ME katak molok ne’e ekipa tékniku sira husi ME ba haree tiha ona no atu haruka materiál konstrusaun hodi hadi’a eskola refere.
“Tuir informasaun husi Diretór Serbisu Edukasaun Munisipál Ainaro katak klase paralela Dugau, husi EBF 1.2.3 Martinho de Araújo Ainaro, no kompostu husi estudante Pré-Eskolár na’in 31, Síklu 1 no 2 hamutuk estudante na’in 71. No eskola refere harii iha tinan 2018,” ME hatete.