Deputadu ne’e dehan, pasiente refere mate iha sala operasaun HNGV.

Tuir informasaun ne’ebé nia simu, Vasconcelhos dehan, pasiente refere mate molok prosesu operasaun remata.

“Opera tiha atu suku seidauk hotu mate tiha ona iha sala operasuan,” dehan deputadu ne’e iha plenaria Parlamentu Nasionál, Segunda (30/09).

Deputadu PLP ne’e dehan, tuir informasaun husi parte familia, molok halo operasaun ne’e, pasiente sei koalia di’ak ho familia sira.

Hafoin kazu ne’e akontese, Vasconcelhos dehan, nia kontaktu ho Diretór Jeral HNGV hodi husu kona-ba kazu refere.

Maibé, DJ HNGV hatete, nia parte sei hato’o relatoriu ba familia.

“Ha’u buka tuir, doutór Xina ida mak opera, durante operasaun ahi mate hela de’it tan ne’e presiza halo jestaun di’ak,” dehan nia.

Maske ema-nia destinu iha Maromak nia liman, maibé deputadu ne’e hatete, doutór sira tenke halo justifikasaun erru iha ka lae, tanba pasiente ne’e mate iha sira-nia liman durante hala’o operasaun.

Aleinde kazu ne’e, deputadu ne’e dehan, iha mós kazu seluk ne’ebé halo pasiente ida tenke lakon nia vida.

Tuir informasaun, Vasconcelhos dehan, iha semana rua liu ba, doutór sira hasai pasiente ida ne’ebé nia kondisaun grave husi sala ICU no ikus mai pasiente refere mate.

“Iha mós pasiente ida hakoi iha Laga, ne’e ema-nia kondisaun grave maibé doutór sira brani hasai husi sala ICU muda fali ba sala seluk, ba iha ne’ebá mate. Tanba ne’e, jestaun iha ospital nasionál tenke buka hodi solusiona atu nune’e labele repete tan ba pasiente seluk,” dehan nia.

Entretantu, to’o notisia ne’e hatun, Jornalista Jornál INDEPENDENTE seidauk konsege halo konfirmasaun ho parte HNGV.