Print this page

Covid-19 Hamate Ema Ida ne’ebé Simu Ona Vasina Kompletu

By Ekipa INDEPENDENTE Outubru 25, 2021 393
Koveiru sira prepara atu ba hiit ema neebe mate ho Covid-19 iha Izolamentu Lahane. Foto;Saturnina/INDEPENDENTE. Koveiru sira prepara atu ba hiit ema neebe mate ho Covid-19 iha Izolamentu Lahane. Foto;Saturnina/INDEPENDENTE.

DILI: Maske simu ona vasina kompletu, maibé presiza kontinua kumpre regra prevensaun Covid-19, tanba virus SARS-CoV-2 bele hamate mós ema ne’ebé simu ona vasina doze kompletu.

Iha 24 Outubru horseik, Sentru Integradu ba Jestaun Krize (SIJK) rejista sidadaun ida ne’ebé simu ona vasina kompletu mate tanba Covid-19.

Tuir informasaun husi SIJK, sidadaun ne’ebé mate ne’e feto ida ho idade tinan 49 hela iha Dili diagnostikadu Sindroma Insufisiensia Respiratoria tanba Covid-19 iha 23 Outubru.

Pasiente ne’e sofre moras rins kroniku no hala’o hela emodializa. Hafoin hala’o tratamentu iha Lahane, pasiente refere iis kotu tanba parajen respiratoria.

Entretantu, ba kazu pozitivu ne’ebé deteta, tuir dadus husi SIJK, iha loron tolu nia laran, hahú husi 22 to’o 24 Outubru 2021, kazu pozitivu ne’ebé deteta hamutuk 21. Husi númeru ne’e kazu barak liu deteta iha kapital Dili ho kazu 18.

Iha 22 Outubru, deteta kazu pozitivu 10. Kazu pozitivu ualu deteta iha Dili, kazu ida deteta iha Kovalima no kazu ida deteta iha Vikeke.

Iha 23 Outubru, deteta kazu pozitivu hitu. Kazu ne’e deteta hotu iha munisipiu Dili.

Iha 24 Outubru deteta kazu pozitivu haat. Dili deteta kazu tolu no Vikeke kazu ida.

Maske kontinua deteta kazu mate no pozitivu, maibé númeru kazu hirak ne’e konsidera tuun maka’as kompara ho númeru kazu ne’ebé deteta iha loron hanesan iha fulan Setembru tinan ne’e.

Tuir dadus, iha 22 to’o 24 Setembru, kazu mate ne’ebé rejista hamutuk na’in haat no kazu pozitivu ne’ebé deteta hamutuk 183. Munisipiu Dili mak rejista kazu aas liu ho kazu 91.

Rate this item
(0 votes)