Print this page

Covid-19 Dudu Xanana Hale'u Timor Featured

By Ekipa INDEPENDENTE Setembru 09, 2020 1586
Xanana iha Lospalos. Xanana iha Lospalos.

MANATUTU: Lider nasionál Kay Rala Xanana Gusmão agradese ho mosu Coronavirus Disease 2019 (Covid-19) tanba ho moras ne’e nia bele hakmatek iha Timor hodi la’o hale'u Timor-Leste.

Nia dehan, surtu Covid-19 mak dudu ba to’o fatin sira ne'ebé nunka tama. Tanba ne’e, aproveita Covid-19 hakarak hale'u Timor tomak.

“Agradese ba buat aat ida naran COVID-19 ne’e, tanba dudu ha’u ba to’o fatin ne'ebé ha'u nunka to’o,” dehan Xanana iha Aldeia Rembor, Suku Aiteas, Postu Manatutu-Vila, horisehik.

Nia hatutan, Covid-19 hamate ona ema tokon ida iha mundu, tanba ne’e husu ba povu tomak kuidadu ho moras ne’e, liuliu iha fronteira tenke kuidadu tanba besik loos liña fronteira.

Nia esplika, Estadu Emerjénsia fulan tolu liu ba tuituir malu hodi eduka ema hotu, labarik sira labele ba eskola, ema boot mós labele sai, entaun eduka agora hodi haree, ferik-katuas, labarik, joven la’o lori tuituir máskara ema hotu sempre uza, ne’e ezemplu di'ak ida mak ne'e.

Covid-19 hodi hanorin ema hotu, tanba Timor nia kultura ulun fatuk toos, dala ruma oan sira de'it mós inan-aman ko'alia la rona ulun sempre toos, ezemplu di'ak mak ema hotu tenke uza ekipamentu protesaun.

Labele Politiza EE

Entretantu, sosiedade sivíl husu ba partidu polítiku no entidade hotu atu labele politiza Estadu Emerjénsia ne’e.

Diretór FONGTIL, Daniel Santos Do Carmo hateten, hanesan sosiedade sivíl husu ba públiku no partidu polítiku no entidade hotu iha rai ida ne’e brani atu halo justifikasaun ida ba mundu katak, asaun preventiva ne’e mak importante.

Ho ida ne’e EE ne’e hanesan meius ida atu preventiva, tanba ne’e mak husu ba entidade hotu labele politiza, tanbasá mak iha diskusaun konsulta hatete katak EE ne’e bele kontinua, maibé kontinua entermu oinsá fó espasu ba Ministériu Saúde (MS) atu halo kontrolu ho rigorozu iha pontu entrada sira.

Iha momentu ne'ebé la halo EE la halo kuarentena obrigatoriu ho kontrolu ema tama-sai, no ema sira ne'ebé hetan Covid ne’e mak sira ba liu komunidade akontese ona tranzmisaun lokál ne’e problema kapasidade atu prevene.

Tanba ne’e, EE fó biban ba governu atu halo atuasaun ho rigorozu iha fronteira sira, ho ida ne’e lalika halo politiza maibé tenke orgullu ho asaun balu ne'ebé iha hodi hatudu ma mundu katak Timor ne’e laiha moras ne’e, atividade ekonómika iha rai laran la'o hela, ema movimentu la’o hela, atividade sira baibain la'o nafatin, governu introdús de'it maka tenke uza máskara, evita labele kaer liman, para Estadu iha biban hodi kontrola de’it maluk sira tama sai iha fronteira ne’e.  

Rate this item
(0 votes)