Prezidente Bankada CNRT Duarte Nunes hatete, Partidu CNRT atu kandidatu ema ba Prezidente Repúblika iha regra sira neebé presiza atu haree.
Nia hatutan, atu hetan kandidatura ida, partidu tenke define uluk kriteria liu husi Konferensia Nasionál ka liu husi Komisaun Politika Nasionál (KPN).
“Jeralmente konferensia Nasionál la deside ema maibé deside mak kriteriu deit, ema tenke hanesan nee, depois ita buka ema, figura sira neebé didiak, ita haree ba kriteriu sira-nee, nia tama ka lae, se tama, prontu diskute iha KPN no Prezidente Partidu deside lori ba rejista,” dehan Duarte iha Parlamentu Nasionál, Sesta (02/07).
Daudauk nee, nia dehan, iha ona figura balun neebé ema balun promove, maibé CNRT sei haree figura hirak nee bazeia ba kriteria neebé sei estabelese.
“Prinsipiu partidu sempre opta ema neebé mak iha esperensia, ema tenke matenek hodi hatene reprezenta nasaun nee, labele arbiru deit, tanba atu promove nasaun nee tenke ema neebé iha koñesimentu no kapasidade diak.”
“Ita koalia demokrásia, ema tenke hatene demokrásia, labele ba halo fali ditadura, ita atu lori nasaun nee ba neebé? nee hau-nia hanoin.”
“Ami-nia hanoin mak nee, partidu sempre opta ba ema neebé mak terbaik hanesan Timor-oan neebé mak diak, maibé (se) CNRT nia ema, diak liu tán,” dehan nia.
Interpretasaun ba K-RDTL Artigu 75
Kriteria sidadaun Timor-Leste atu kandidata an ba Prezidente Repúblika hatuur ona iha artigu 75 Konstituisaun. Maske nunee sei iha diskusaun balun kona-ba see mak merese no la merese.
Atu bele hatene klean, jornal INDEPENDENTE halo intervista ho jurista Timor-oan neebé mós nuudar Amu Lulik ida, Julio Crispin Belo, hodi fó hanoin kona-ba kriteria kandidatu PR tuir K-RDTL.
Iha konstituisaun RDTL artigu 75 kona-ba Elejibilidade, iha númeru 1 hatete: “Bele Tuir kandidatura ba Prezidente Repúblika sidadaun Timor-oan sira neebé, iha ilas hotu tuir mai nee: a) Sidadaun nanis; b) Iha tinan minimu 35; c) Ho kapasidade diak; d) Neebé hetan proposta husi sidadaun hili-nain minimu nain rihun lima.”
“Primeiru kritériu mak sidadaun orijinária. Sidadania orijinária kontinua ba artigu 3 konstitusaun katak sidadaun orijinária Timor-Leste mak ida neebé moris iha territoriu nasionál, aman-inan moris iha Timor. Nunee oan husi inan-aman nasionalidade dezkoñesidu, inan-aman estrajeiru, maibé bainhira nia too idade 17 deklara sai Timor-oan, no sidadaun orijinária seluk mak nia moris iha territóriu estranjeiru, maibé inan-aman Timor-oan.”
Kriteria daruak, Amu Crispin hatete, kriteria nee relasiona ho idade husi sidadaun neebé hakarak kandidata an.
“Kandidatura Prezidente Repúbliku tenke tinan mininu 35 no masimu konstitusaun la dehan, tanba nee hanesan Avo Xavier kandidatu an too mate ho ninia kandidatura ba Prezidente.”
Ba kriteria datoluk kona-ba kapasidade, nia dehan, tuir konstitusaun kapasidade nee relasiona ho sidadaun ida bele ezerse nia direitu no kumpre nia obrigasaun.
“Plenu kona-ba kapasidade lei dehan hahú tinan 17 iha ona kapasidade hodi nunee nia bele azerse nia direitu no kumpre nia obrigasaun,” nia hatete.
Kriteira ikus mak kona-ba hili-nain ka votante neebé kandidatura ida presiza kumpre hodi bele kandidata an sai PR.
“Kritériu haat nee mak konstituisaun RDTL fó duni ba sidadaun feto no mane neebé iha tinan 35 ba leten, bainhira kumpre rekezitu sira nee bele sai kandidatu ba Prezidente Repúblika. Maibé la tuir kriteria haat nee labele, tanba kandidatu kontra kedas konstituisaun, tanba ida nee elejibilidade tuir konstuisaun nian,” nia hateten.
Maske nunee, tuir nia, Prezidente Repúblika tenke iha koñesimentu ba situasaun rai laran tomak, no koñese sistema estadu hirak iha rai liur. Tanba PR iha kompeténsia neebé boot liga ba polítika sterna.
Tan nee, tuir nia, ema neebé kandidata an tenke koñese sistema rai liur, tenke iha konesimentu ba relasaun internasionál, direitu internasionál públiku, ekonómia mundiál, no sistema podér mundiál.
“Laós koñese deit maibé pelumenus iha esperénsia ezersisiu podér internu neebé mak bazeia ba konstituisaun sira no mós koñese uitoan ezersisiu podér rai seluk nian,” dehan nia.