Print this page
Sekretariu Estadu Meu-Ambiente fahe produtu loka liu husi programa sesta bazika. Foto Tempotimor. Sekretariu Estadu Meu-Ambiente fahe produtu loka liu husi programa sesta bazika. Foto Tempotimor.

CNRT-PD Kritika Politika Sesta Bazíka ho “Pasta Kosé Nehan” Featured

DILI:Impaktu husi pandemia Covid-19 fó dalan ba Governu hamosu politika oioin, tantu husi programa subsidiu fahe osan $200, fahe osan ba ekipa liña oin kombate Covid-19, ofrese pulsa eletrisidade gratuitu, too fahe mós “pasta kosé nehan”.

Tanba ne’e, Deputadu sira husi Bankada CNRT ho Partidu Demokratiku (PD) halo kritika makás hasoru politika ne’ebé fahe mós “pasta kosé nehan” ba komunidade, tanba sees ona husi planu inisiu.

Deputada CNRT Virginia Ana Belo no Fernanda Lay kestiona implementasaun Sesta Bázika tanba ladun iha transparénsia.

Ana Belo hateten, atu asegura orsamento millaun $71.5 ho transparensia Governu tenke gradualmente halo ona relatório orsamentu hira ona mak gasta ona ba implementasaun Sesta Basika ne.

"Ha’u akompaña Governu foin implementa Sesta Basika iha Suku tolu hanesan pilotu projetu maibé ami ezijé Governu tenke halo ona relatorio,”dehan Virginia iha Parlamento Nasional ba Jornal Online INDEPENDENTE, Segunda ohin.

Iha Fatin hanesan Deputada Fernanda Lay husi Bankada CNRT kestiona makás tanba implementasaun Sesta Bázika iha Suai, Munisipiu Covalima fahe mós pepsodente kosé nehan ho folin 0.50 sentavus de’it.

“Ha’u hanoin populasaun Suai sente triste tanba implementasaun Sesta Bázika iha Suai fahe mós  pepsodente kosé nehan nian, afinal ida ne’e la’os tama ba kategoria rekoperasaun ekonomia nian, husu ba Governu tenke trata ita nia populasaun ho justu no dignu tanba ita nia populasaun la’os ho folin  0.50 sentavos nian,''Lay lamenta.

Entertantu Presidente Bankada Partido Demokratiko (PD), Antonio da Concecao mós triste bainhira rona iha Suai Governu fahe mós Sesta Bázika ho item pepsodente ho folin 0.50 sentavus de’it, ne’e hatun dignidade populasaun sira.

"Ha’u hanoin pepsodente bele fahe iha estadu emergensia dahuluk nian tanba tempu neba ema hotu kumpri estadu emerjensia hodi hela iha uma de’it no laiha osan atu kompras maibé Sesta Bázika agora ne’e hanesan rekoperasun ekonomia, tanba ne’e populasaun presija osan no hahan la’os pepsodente,”dehan Kalohan.

Kalohan rekomenda Governu tenke hadia naksalak sira ne’e iha futuru.

Read 1569 times
Rate this item
(0 votes)