Enkuantu, suspeitu na’in rua ne’e, hela fatin iha Kapital Dili no Munisipiu Líkisa.

Tuir komunikadu ne’ebé Online INDEPENDENTE, asesu iha Pajina CAC, hatete, mandadu Buska apreensaun no detensaun ba suspeitu nain rua ne’e relasiona ho projetu instalasaun Set-Top Box iha Ministeriu Asuntu Parlamentar no Komunikasaun Sosial (MAPKOMS), ne’ebé lidera husi Ministro Francisco Jeronimo ne'ebe servisu hamutuk ho RTTL, E.P.

Enkuantu, projetu ida ne'e hetan ajudu husi Governu Xina ho total orsamentu besik dolar amerikanu $500.000.

Karta Mandadu Buska Apreensaun no detensaun ne’e asina husi Juiz Direitu José Goncalves ne’ebé haknar-an iha Tribunal Distrital Dili iha loron 26 fulan Setembru 2022 ho numeru NUC 0016/21 CACTL.

Iha mandadu ne’e, Juiz Direitu José haruka no fó ordem ba CAC nudar orgaun polisia kriminal espesializada halo buska iha domisiliariu ho posibilidade ba prende sasan ne’ebé bele iha ligasaun ho faktus hirak ne’ebé investiga ona, tuir dispozisaun iha artigo 37 no 2, husi KRTL, iha artigo 226 no 1 aliña c), artigo 168 no 1 no artigu 170 hotu-hotu husi Kodigu Prosesu Penal (KPP) ba suspeitu sira nian hela fatin iha Matadoru no Líkisa.

Juiz Direitu José Gonçalves fó ordem ba orgaun polisial espesializada CAC halo buska ne’e konsede iha auto inkeritu nian ne’ebé investiga dadaun hela suspeitu kona ba autoria krime, p.p. husi art Kodegu Penal nian.

Mandadu ne’e mos Juiz Direitu José Gonçalves mós haruka CAC halo detensaun ba ema ne’ebé temi iha karta mandadu ne’e nudar suspeitu ne’ebé sei investiga tanba halo krimi p.p. husi artigu Kodigu penal nian.

Hafoin CAC halo detensaun durante 72 horas nian laran orgaun polisial spesializada CAC obrigatoriamente aprezenta sira na’in rua (2) ba iha juiz iha Tribunal Distrital Dili hodi halao primeiru interogatoriu judisial.

Suspeitu na’in rua oras ne’e detein ona iha sela detensaun CAC Farol no sei aprezenta ba Tribunal Distrital Dili iha loron sesta-feira (14/10) hodi halao Primeiru Interogatoriu.

Durante suspeitu na’in rua detein iha sela detensaun CAC nian iha Farol, CAC la viola direitu fundamental suspeitu sira nian hodi loke oda matan ba familia no kolega servisu sira asesu mai vizita hatoo sira ninian solidaridade, enkoraja no hametin suspeitu sira ninian moral atu halao prosesu justisa.