Governadór BCTL, Hélder Lopes dehan, update ba PR Horta kona-ba preparativu sira-ne'ebé BCTL halo ba moeda rasik ne'ebé ohin entrega dokumentu ida ba Prezidente Repúblika.
Nune'e, kontinua hetan orientasaun husi nai ulun sira saida mak BCTL halo hodi hametin ekonómia no mós se karik aban bainrua iha futuru mak iha moeda rasik bele mitiga soké ho risku sira ne'ebé dala ruma mosu, tanba introdusaun moeda rasik.
“Foin daudauk ita boot sira dala ruma akompaña, iha polémika uitoan kona-ba 200 sentavus ne'e ami atualiza ba Prezidente Repúblika katak, situasaun ida ne'e rezolvidu ona. Rezolvidu iha sentidu agora situasaun kalma, ami kontinua foti medida hodi servisu hamutuk ho entidade relevante ba halo sosializasaun ba ita ninia moeda sira, nune'e ita nia sosiadade bele hatene,” Informa Governadór BCTL, Hélder Lopes ba jornalista sira, hafoin enkontru ho PR Horta iha Palásiu Prezidensiál Bairu-Pite, Sesta (27/03).
Iha sosializasaun ne’e, nia hatete, depois ba mós ko'alia ho loja sira-ne'ebé dúvida ho 200 sentavus, nune’e bele esplika para simu moeda ne’e, tanba ne’e orijnal.
Nia esplika, iha parte seluk instituisaun relevante sira ne'ebé iha área investigasaun kontinua halo sira nia servisu hodi investiga ba autór sira-ne'ebé tenta atu falsifika moeda iha rai laran, pelu-menus ida ne'e mak BCTL hato'o ba Prezidente Repúblika.
Iha fatin hanesan, Vise Governadora Sara Lobo hatete, relativamente ho sosializasaun primeiru ekipa BCTL hamutuk ho MCI halo uluk sosializasaun perkore iha Dili laran, loja sira ne'ebé Xineza sira no mós loja lokál sira.
“Tuir mai sei perkore mós munisípiu sira-ne'ebé karik iha semana oin mak ekipa sei tun perkore munisípiu sira hotu, nune'e bele fahe informasaun ba ita nia sidadaun sira,” Nia haktuir.
Nia haktuir, Governadór hato'o ona katak prosesu falsifika moeda ne'e entrega ba entidade kompetente sira-ne'ebé halo kna'ar investigasaun.
“Sira mak sei buka tuir autór sira, depois ita sei rona hotu nia rezultadu, purenkunatu ami laiha informasaun,” Nia hatutan.
Governadór BCTL, Hélder Lopes reforsa tan, medida ne'ebé BCTL halo ne'e fahe ba rua, ida mak medida temporária, ne'e mak halo sosializasaun hanesan Vise Governadora hato'o ona katak, BCTL servisu hamutuk ho entidade relevante governu nian.
"Depois ita ba sosializa kona-ba meoda asli iha nian no mós ita ba hatete, entidade komersiais sira ita sosializa ba sira atu sira kompriende. Mais medida ba médiu to'o logu prazu mak ita ho dijitalizasaun ne'ebé BCTL agora daudaun prepara hela, iha tempu barak pagamentu sira ne'e ita sei promove dijitalizasaun, nune'e ita bele halo pagamentu ba dijitál,” Nia reforsa.
Nune'e, preokupasaun kona-ba osan falsu, ema falsifika ida ne'e bele mitiga uitoan.