Print this page
kazu Positivu Covid-19 kazu Positivu Covid-19

Atuál Covid-19, Kazu Hamutuk 55 Featured

DILI:Sala Situasaun Sentru Integradu Jestaun Krize (SIJK) relata ohin loron 16 ekipa konjunta saúde deteta kazu foun na’in 55, kompostu husi munisipiu Dili na’in 43 no munisipiu sira seluk hanesan Aileu ho Manufahi hamutuk na’in 12. 

Kordenador Forsa Tarefas no Mitigasaun Surtu Covid-19 iha Timor-Leste, Rui Maria de Araujo hatete, kazu foun hirak ne’e iha mane na’in 29 no feto na’in 26.

“Ema ne’ebé sintomas iha na’in 1 no asintomatiku ka la hatudu sintomas hamutuk na’in 54,”dehan nia iha konferensia imprensa liu zoom, iha CCD, (16/04).

Husi total kazu detetadu foun ohin iha 39 ka hanesan ho 70% husi total kazu mak deteta tanba sira halo teste, ho razaun atu viajem ka halo ona viajem ba munispiu hafoin deteta kazu positivu.

“Husi total kazu ida ne’e hatudu katak, oras ne’e dadaun ita iha difikuldade atu buka tuir kontaktu besik ho kazu positivu sira, maibé ekipa konjunta saúde nian nafatin halo esforsu atu buka tuir sira hotu ne’ebé halo kontaktu besik ho kazu positivu,”tenik nia.

Entretantu kazu foun ohin loron hamutuk na’in 55, kazu rekuperadu iha na’in 60 no kazu ativu ne’ebé iha izolamentu hamutuk na’in 560.

Husi loron horseik (15/04) mai ohin loron 16 Laboratorium Nasional Saúde halo teste PCR hamutuk 1.139. husi detallas hanesan tuir mai, vijilansia sentinela iha 234, restreiu ba kontaktu iha ema na’in 142, no viajem atu sai husi serka sanitaria Dili hamutuk 730.

Ema ne’ebé husu teste PCR atu viajem ba internasional hamutuk na’in 20, no follow up iha kuarentena hamutuk 34.

Total pedidu autorizasaun esepsional atu sai husi serka sanitaria munisipiu Dili hamutuk 325, Sekretaria Estadu SIJK responde hotu. Maibé iha 15 pedidu hirak mak la prinse kriteria rezulusaun Governu.

Bazeia ba dadus foun mundial husi Worldometers fó sai iha sesta ohin (16/4), kazu positivu hamutuk ema millaun 140 (kazu 139.665.857). Husi total kazu positivu ne’e, mate kumulativu millaun 3 (mate na’in 2.998.843), kada loron ema mate aumenta rihun 13.839.

Pasiente rekuperadu hamutuk 118.752.182 no kazu ativu na’in 17.914.832. Nasaun Estadu Unidos amerika mak nasaun dahuluk kazu positivu hamutuk 32.224.080, mate na’in 578.993. Nasaun daruak mak India konfirma kazu positivu hamutuk 14.287.740, no mate na’in 174.335.

 

Jornalista: Saturnina da Costa

Editor: Jose Sarito Amaral

Read 323 times
Rate this item
(0 votes)