Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, husi númeru kazu foun 84 ne'e, iha mane na’in 54 no feto 30.

“Husi total kazu detetadu foun ohin, iha idade tinan 12 mai kraik na’in 3, idade entre tinan 12-59 iha na’in 80 (95,2%) no  idade 60 ba leten iha na’in 1,”dehan nia iha komunikadu, ne’ebé Online INDEPENDENTE asesu, kinta ohin (6/05).

Nia esplika, husi horiseik (5/5) mai ohin (6/5) teste PCR ne'ebé Laboratóriu Nasionál Saúde halo hamutuk 1102 kompostu husi, Vijilánsia sentinela 53, Rastreiu ba kontaktu (Contact tracing) 94, Rastreiu Aleatoriu (Random Screening) 116, Viájen sai husi serka sanitária husi Dili  483, Viájen internasionál  45 no Follow up iha kuarentena 44.

Aliende teste PCR ne’ebé halo horseik (5/5) iha munisípiu sira seluk hamutuk 336 mai husi munisipiu  Baucau 152, Maubisse 136, Suai 33 no Maliana 15.

Ho nune’e total  kazu konfirmadu kumulativu  sura  husi  loron 21 fulan-marsu tinan 2020 to’o loron 6 fulan-maio tinan 2021 hamutuk 2.870.

Entretantu dadus jeral ba loron ohin iha kazu foun na’in 84, kazu rekuperadu 81 no kazu ativu iha izolamentu hamutuk 1,417.

Enkuantu dadus mundial Covid-19 iha kazu foun ohin loron (6/05) hamutuk 153,954,491 no kazu mate hamutuk 3.221.052.

Asisten Editor: Saturnina da Costa