Tuir Diretor Edukasaun Munisipiu Ermera Marcos Soares Martins hatete, edukasaun Munisipiu Ermera simu ona despaixu husi MEJD hodi kontinua suspende provizoriamente atividade prezensial iha Dili no Ermera durante semana ida nia laran.
“Horseik ita simu ona despaixu husi MEJD katak kontinua suspende ita nia atividade prezensial iha Ermera inklui mós iha Kapital Dili, tanba kazu positivu kontinua as, ho Ida ne’e maske atividade prezensial suspende maibé ita kontinua apela ba ita nia professor sira hodi prepara material rezumu ba estudante sira hodi estuda, aleinde prepara material rezumu prepara mós material ezame nian,” afirma nia via telephone, tersa (14/09).
Nia hatutan, Atividade prezensial iha Munisipiu Ermera no Dili kontinua suspende hahú iha loron 13 to’o 19 fulan-Setembru, tanba ne’e sira husi nafatin ba professor sira hodi vasina no prepara mós material rezumu ba estudante sira ba periode daruak no dotoluk nian.
Entretantu, Despaixu nú 48/GMEJD/IX/2021 husi Ministru Edukasaun Juventude no Desportu Armindo Maia informa, Governu kontinua suspende provizoriamente atividade prezensial iha Munisipiu Ermera no Dili tanba haree ba kazu positivu Covid-19 kontinua as iha Munisipiu refere.
“Ita kontinua suspende atividade prezensial iha Dili no Ermera tanba ita haree ba kazu positivu covid-19 kontinua as, ho Ida ne’e ita labele reativa no kontinua suspende fila-fali tuir despaixu nú 48/GMEJD/IX/2021, atu nune’e bele prevene ita nia estudante sira husi moras ne’e rasik,” dehan nia iha MEJD, segunda (13/09).
Iha loron 14 fulan-Setembru sala situasaun sentru integradu jestaun krije (SIJK) rejista tan kazu pozitivu foun covid-19 hamutuk 118, no ema ne’ebé mate ho Covid-19 iha Izolamentu ema na’in rua (2).
Kordenador Forsa-Tarefa ba Prevensaun no Mitigasaun Surtu Covid-19 iha Timor-leste, Dr. Rui Maria de Araujo hatete, Munisipiu Dili kontinua rejista númeru kazu bo’ot liu kompara ho Munisipiu sira seluk.
Husi total kazu detetadu 118, iha Dili deteta kazu hamutuk 93, Bobonaro kazu 5, Baukau kazu 5, RAEOA kazu 5, Aileu kazu 1, Kovalima kazu 3, Lautem kazu 4 no Vikeke kazu 2.
“Husi kazu detetadu ne’e, na’in 54 ka 54,2% hatudu sintomas, na’in 31 ka 26% simu ona vasina kompletu no na’in 12 ka 10% simu ona vasina doze dahuluk,”dehan nia.