Komandante PNTL Munisipiu Dili, Superintendente Xefe Polisia Orlando Gomes hatete, Komando PNTL Dili sei la autoriza joven ka sidadaun sira atu konsumu tua iha rate.
"Ita haree katak iha tinan hirak liu ba bainhira konsumu alkohol iha rate laran sempre mosu provokasaun no hamosu konflitu,” dehan Orlando ba jornalista sira, iha nia knar-fatin, Segunda (27/10).
Komandante ne’e husu mós ba sidadaun sira ne’ebé kari aifunan iha rate atu labele ba semiteriu liu tuku hitu kalan.
“Kari aifunan sedu, antes tuku neen hotu ona, atu nune'e seguransa bele kontrola iha loron lokraik ninian. Tanba iha tempu kalan ne'e susar uitoan kontrola, tanba nakukun labele kontrola,” dehan nia.
Planu seguransa
Komando PNTL Dili simu ona orientasaun ka diretivas operasional konjuntu husi Komando Jeral PNTL atu halo planu seguransa ba loron Finadu.
Iha planu operasaun, nia esplika, Komando PNTL Dili utiliza mak metodu rua. Ida, halo preparativus hodi organiza membru sira no halo patrulamentu lao ain tama no sai bairo sira atu bele garante seguransa hakmatek, molok tama ba loron Finado.
Metodu daruak mak halo planu kolokasaun seguransa ba iha semeteriu sira ne'ebé identifika nu’udar risku ba konflitu.
"Entaun ita koloka membru sira maximu uitoan par atu bele asegura semeteriu refere, atu nune'e fó biban ba sidadaun sira par bele halo movimentu, lori aifunan ba iha rate no fila ho seguru," Orlando esplika.
Aleinde koloka iha fatin ne’ebé risku konflitu, nia dehan, Komando mós koloka membru iha semiteriu hotu-hotu iha kapital Dili.
"Ita mós koloka membru tranzitu sira iha simeteriu hotu-hotu iha Dili laran par atu nune'e bele organiza oinsa mak transporte sira ne'e ninia parajen tenki ho displina, tanba iha fatin balu ita sei blokeia, nune'e la autoriza transporte sira tama to'o iha simeteriu,” dehan nia.
Komando PNTL Dili mós alerta ba membru PNTL atu laiha pedidu lisensa anual ka kualker tipu lisensa atu nune’e bele kobre hotu simeteriu iha kapital Dili.
“Ita hakarak iha kada semeteriu tenke iha polisia hotu, par atu nune'e hamutuk ho ita-nia F-FDTL no parseiru KPK hodi garante seguransa," dehan nia.