Print this page

APSCTL Asina Akordu ho Governu Implementa Rezolusaun ONU 1325 Feto, Pás no Seguransa Iha TL Featured

By Komunikadu Imprensa Juñu 08, 2021 601
APSCTL Asina Akordu ho Governu Implementa Rezolusaun ONU 1325 Feto, Pás no Seguransa Iha TL. Foto:Gab, GASC. APSCTL Asina Akordu ho Governu Implementa Rezolusaun ONU 1325 Feto, Pás no Seguransa Iha TL. Foto:Gab, GASC.

DILI:Organizasaun Asia Pacific Suport Collective Timor-Leste (APSCTL) asina akordu ho Governu liu husi Gabinete apoiu Sosiedade Sivil (GASC), hodi implementa rezulusaun ONU 1325 kona ba feto, páz no seguransa.

Hafoin asina akordu, reprezenta Governu liu husi GASC, Filipe da Costa intrega akordu ba subvensaun ba reprezentante organizasaun APSCTL, Diretora Exekutiva, Isabel Maria Marçal Sequeira.

Diretora Exekutiva, Isabel Maria Marçal Sequeira hatete, sira hetan subvensaun públika husi fundu Gabinete Apoio Sosiedade Sivil ho montante osan dolar amerikanu $20,000.00 hodi finansia ba programa empoderamentu feto nu'udar ajente transformasaun sosiál iha família no komunidade.

“Subvensaun ne'e atu finansia ba programa formasaun no sensibilizasaun kona-ba feto, pás no seguransa tuir Rezolusaun Seguransa Nasoins Unidas 1325 liu-husi atividade koordenasaun, konsultasaun ho autoridade lokál, parókia no estudante sekundária”, dehan nia iha komunikadu ne’ebé Online INDEPENDENTE asesu, tersa ohin (08/06).

Isabel akresenta, objetivu no rezultadu prinsipál husi subvensaun ne'e mak atu eleva koñesimentu feto liga ba Rezolusaun ONU 1325 kona-ba papél feto sira ba prevensaun, no mós rezolusaun konflitu no envolvimentu ba promosaun pás no seguransa iha komunidade, eskola, atu muda mentalidade no atitude hodi evita diskriminasaun no marjinalizasaun ba feto.

Nune’e, atu hasa'e konxiénsia komunidade, autoridade lokál, juventude hodi prevene violénsia.

Koordenadór Gabinete Apoiu Sosiedade Sivil (GASC), Filipe da Costa hatete, ohin entrega akordu subvensaun publika husi Governu Timor-Leste ba APSCTL atu hala'o programa sensibilizasaun feto, pás no seguransa tuir Rezolusaun Konsellu Seguransa Nasaun Unidas 1325, loron 31 Outubru 2000 hodi reafirma importante papél feto sira iha prevensaun no rezolusaun konflitu sira, kria pás no estabilidade, nomós medida sira atu proteje feto sira husi violénsia bazeia ba jéneru.

“Atividade ne'e kapa'as tebes hodi envolve feto sira iha eskola, autoridade lokál, ajente parokiál, nune'e sira-nia proposta hetan aprovasaun ho valór orsamentu $20,000,00. GASC kontente maski ita-nia nasaun enfrenta krize oioin liu-liu pandemia Covid-19, maibé APSCTL kontinua esforsu hodi hala'o sira-nia knaar hodi kontinua programa governu ba sosiedade ida pás, estabilidade no trankuilu iha sosiedade-nia laran”, dehan nia.

Koordenadór GASC, afirama, GASC sei transfere dahuluk ho valór orsamentu pursentu 40 (40%) ka montante dolar amerikadu $8,000.00 hodi hala'o atividade APSCTL nian, no transferénsia pursentu 60 (60%) sei tuir-mai bainhira gabinete hetan ona relatóriu ezekusaun ba pursentu 40 (40%) nian.

“Tanba ne’e, husu ba APSCTL atu kumpri akordu ba implemetasaun programa ne'e hodi benefísiu ba ita-nia estudante, juventude, ajente parokiál no autoridade lokál sira,”tenik nia.

Enkuantu, tuir planu akordu APSCTL nian  sei implementa atividade iha Postu Administrativu Cristo Rei, Metinaro no Nain Feto, Munisípiu Dili.

 

 

Asistente Editor: Saturnina da costa

Rate this item
(0 votes)