Prezidente APFTL Zaulino Gomes da Silva hateten, plenaria Parlamentu Foinsa'e u'udar espasu ida atu diskute problema sosiál ne'ebé mak joven sira hasoru iha kada postu administrativu ida-idak.
“Plenaria Parlamentu Foinsa'e nian nu'udar espasu ida atu diskute problema sosiál ne'ebé mak joven sira hasoru iha kada postu administrativu ida-idak, hodi diskute iha Plenaria ida ne'e, nune'e audensia sira no liuliu parte governu sira bele hatene joven sira nia problema ne'ebé akontese iha postu administrativu,” dehan nia iha salaun MSSI, Kaikoli, Dili, Kinta (31/07).
Nia dehan, membru Parlamentu Foinsa'e ne’ebé partisipa iha plenaria periode dalima ne’e hamutuk na’in 138 husi membru hamutuk na’in 140, ne’ebé kompostu husi joven feton no mane, inklui mós ema ho defisiénsia sira, ne’ebé mai husi munisipiu sira iha teritoriu nasional.
Plenaria ne’e hala’o bazeia ba projetu Rezolusaun Governu kona-ba alterasaun daruak ba Rezolusaun Governu n. 23/2009, loron 18 fulan-novembru, ne’ebé aprova Parlamentu Foinsa’e Nian, ne’ebé aprezenta husi Ministru Juventude, Desportu, Arte no Kultura, Nelyo Isaac Sarmento iha mandatu IV governu konstituisional.
Projetu rezolusaun Nu 23/2009, 18 de Novembru halo ona altersaun daruak iha loron 17 de Abríl foin lalais halo ona ba dala rua.
“Husi alterasaun rezolusaun ba dala rua, signifika governu iha komitmentu ba investimento ba Joven sira atu re-espasu no prepara ba kuadru estadu no prepara lideransa iha futuru,”tenik Prezidente APFTL.
Nia akresenta, espasu Parlamentu Foinsa'e sira nian mak atu aprende, prátika no demokrasia no oinsá joven sira atu komprende sensibilidade Umanus no problema sosiais sira.
Tanba membru Parlamentu Foinsa'e mak Foinsa'e ida ne'ebé mak rona no haree diretamente iha sira nia Postu ida-idak no rona problema ne'ebé mak joven sira hasoru iha baze no mós problema sira seluk hanesan edukasaun, saúde empregu no sira seluk ne'ebé relasiona ba Joven sira nia Moris.
Iha fatin hanesan, Sekretáriu Estadu Juventude Desportu Arte no Kultura Nélio Isaac hatete, mandatu Membru Parlamentu Foinsa'e ba periodu dala-V, sei remata iha tinan ida ne'e no sei halo eleisaun no rekrutamenu ba membru Parlamentu Foinsa'e foun ba period da-VI nian iha tinan oin.
Nune’e, MJDAK husu ba membru Parlamentu Foinsa'e tinan ne'e sei rai hela buat diak ida, atu nune'e membru foun mai sira bele aprende no banati tuir.
Entretantu, iha plenaria durantu loron-rua ba asuntu liman (5) mak hanesan, edukasaun, joven ho moris saudavel, joven ho empregu no Empregabilidade, joven ho partisipasaun síviku no mós joven ho violensia no krime.