Print this page

AMP Deside Mantein Lista Membru Governu Pendente Featured

By Jacinto Xavier Juñu 21, 2019 1851
AMP AMP

DILI: Bloku Aliansa Mudansa ba Progresu (AMP) deside hodi mantein lista kandidatu membru governu ne’ebé prendente hela no husu ba Prezidente Repúblika Francisco Guterres Lu Olo atu justifika formalmente ninia pozisaun.

Desizaun ida ne’e AMP konsege foti liu husi Konferensia AMP ho tema “Konsolida AMP hodi Serbi Di’ak Liu tan Povu” ne’ebé realiza durante loron rua nia laran, Sabadu (15/06) no Domingu (16/06).

Kandidatu membru governu ne’ebé PR Lu Olo deside hodi pendente mak Francisco Kalbuadi Lay, Helder Lopes, Virgilio Smith, Jacinto Rigoberto, Tomas Cabral, José Turquel, Amandio Benevidas, inklui Xanana Gusmão no Antonio Verdial ne’ebé  rejigna aan ona.

Tuir AMP nia haree, Governu ne’ebé la kompletu prejudika implementasaun programa governu no ezekusaun Orsamentu Jeral Estadu.

“AMP reitera nia apoiu tomak ba membru Governu VIII ne’ebé indijitadus atu hetan posse hodi halo kompleta membru Governu Konstitutisionál VIII atu serbi estadu no nasaun ida ne’e tuir povu nia desizaun,” deklara AMP liu husi karta komunikadu ne’ebé INDEPENDENTE asesu, Tersa (18/06).

Ho nune’e, AMP husu ba Primeiru Ministru Taur Matan Ruak atu halo nafatin komunikasaun ho PR Lu Olo hodi asegura tomada posse ba membru governu pendente sira.

AMP mós husu ba PR Lu Olo atu justifika formalmente nia pozisaun ba kandidatu membru governu pendente.

“Husu ba Prezidente Repúblika justifika formalmente (por escrrito) nia pozisaun kona-ba membru politiku indigitados ne’ebé hetan mandatu husi aliansa vensedor iha eleisaun jeral anatesipada 2018, ne’ebé prejudika mós integridade pessoal sira nian nu’udar sidadaun RDTL, tuir Konstituisaun Republilka Demokratika Timor Leste”.

Bainhira laiha solusaun, AMP deklara, sei halo dialogu ho kualker intidade no personalidade politika iha Timor Leste.

Obsaun seluk: Re-estruturasaun

Entretantu, observador politika husi Universidade Nasionál Timor Lorosa’e (UNTL) Camilo Ximenes Almeida fó obsaun rua ne’ebé Primeiru Ministru bele konsidera hodi rezolve problema membru governu la kompletu.

Obsaun dahuluk mak halo remodelasaun no obsaun daruak mak halo re-estruturasaun ba estrutura governu.

“Ha’u uluk ko’alia ona (se) bele karik governu hamosu remodelasaun, bainhira lakohi entaun dalan di’ak liu mak halo re-estruturasaun,” dehan Camilo iha nia knar-fatin, Kampus Faspol, Kaikoli.

Observadór ne’e dehan, ezekusaun OJE 2019 nian daudaun ne’e la’o lentu hela tanba kauza husi membru governu seidauk kompletu.

“Normalmente iha ema nia rain kuandu estruturta governu seidauk kompletu iha tinan ida nia laran ne’e tenke halo ona mudansa,” dehan nia.

Tanba, nia hatete,  se ministru ida mak laiha bele implika ba ezekusaun orsamentu, tanba iha minitériu ida, ministru mak iha poder atu halo desizaun hodi jere orsamentu.

Nia hatutan, karik PM no AMP lakohi halo remodelasaun, dalan seluk mak halo re-estruturasaun hodi nomeia fali Vise Ministru sira sai Ministru.

“Karik preisza tan Sekrétariu Estadu ruma bele kompleta hodi nune’e sira bele hala’o sira-nia knaar hodi ezekuta OJE ne’ebé aloka ba kada ministeriu.”

Camilo dehan, bainhira deside atu aumenta nafatin membru governu hodi akumula ema husi partidu iha bloku AMP ne’ebé seidauk hetan kadeira, PM Taur tenke halo serbisu boot ida hodi konvense partidu CNRT ho KHUNTO atu troka kandidatu membru governu ne’ebé PR Lu Olo pendente.

Aleinde ne’e, nia dehan PM mós tenke husu ba PR Lu Olo atu husu ba Tribunal hodi esklarese kandidatu membru governu na’in sia ne’ebé pendente komete duni aktu krime korrupsaun ka lae.

“Tanba labele tau ema iha enkauza depois sein justifikasaun. Atu tama ona tinan ida maibé laiha justifikasaun,” dehan nia.

Rate this item
(0 votes)

Related items