Mari Alkatiri atual Sekretariu Jeral Partidu Fretilin asume kargu nu’udar Primeiru Ministru hahú husi tinan 2002 to’o 2006. Enkuantu, Taur Matan Ruak atual Prezidente Partidu Libertasaun Popular (PLP), asume kargu nu’udar Prezidente Repúblika husi tinan 2012 to’o 2017, no Primeiru Ministru husi tinan 2018 to’o 2023.

Desizaun husi eis titular na’in rua, inklui atual Xefe Governu ne’e mosu hafoin iha 26 Setembru Parlamentu Nasionál (PN) ho votus unanimidade aprova projetu lei númeru 11/VI(3a) kona-ba revoga Pensaun Mensal Vitalisia ba deputadu no eis titular orgaun soberanu.

Alkatiri hamamuk uma estadu

Eis titular, Mari Alkatiri deklara hahú hamamuk uma estadu iha area Farol ne’ebé durante ne’e nia utiliza.

"Ha'u molok mai iha ne’e foti hela sasan atu muda uma, tanba ha'u laiha direitu ona ba uma estadu. Ha'u fundador, ha'u fó ha’u-nia tinan 55 husi ha'u-nia tinan 75 ba rai ida ne'e, ba povu ida ne'e. Agora laiha direitu,” deklara Alkatiri iha ninia intervensaun politika iha abertura ba Asembleia Suku Santa Kruz, Kintal Boot, Domingu (28/09).

Maske lamenta, maibé Alkatiri prontu hodi entrega fasilidade hotu-hotu ne’ebé durante ne’e nia simu.

“Agora ha’u laiha direitu, laiha buat ida. Se ha'u de’it mak laiha direitu. Se problema ho ha'u, ha’u bele simu ha’u laiha direitu ba buat ida, mais favor ida labele dudu tan ema seluk ba kiak. Labele dudu tan ema seluk ke agora moris ho saida mak sira simu fulan-fulan ba sira, ba sira-nia oan, dudu sira ba kiak, ne’e la loos.”

“Se la gosta ha'u, hasoru ha'u de’it, ha'u hasoru imi,” dehan eis PM ne’e.

Atual Sekjer Fretilin ne’e hatutan, iha 28 Setembru karik sai mós nu’udar loron ikus ba nia hodi la’o ho seguransa husi Polisia.

“Ohin dala ikus mak ha'u mai ho seguransa polisia. Aban keta ha’u laiha direitu ona la’o ho seguransa. Ne’e tanba sa? Buka ha’u-nia sala durante tinan 20 resin, uza KAK, uza buat hotu, la hetan sala, agora hatauk ha’u. Ha’u sei joven la tauk, la’os 75 anos, 76 anos ha’u atu tauk fali,” deklara nia.

Iha biban ne’e, Sekjer Fretilin ne’e mós informa, nia simu kontaktu husi eis Prezidente Repúblika, 2018-2023, Francisco Guterres Lu Olo, ne’ebé preokupa tebes ho situasaun ne’ebé daudauk ne’e mosu.

“La’os ho ha’u de’it, Prezidente Lu sira sei hasai. Ha’u foin simu telefonema husi Prezidente Lu preokupadu tebes tanba nia la hatene atu ba ne’ebé,” Alkatiri informa.

Taur hahú entrega fasilidade

Iha 26 Setembru, eis PM no eis PR Taur Matan Ruak, entrega ona karreta eis titular nian ba Sekretariadu eis titular.

Tuir informasaun husi ema ne’ebé besik ho Taur, daudauk ne’e sira hahú aruma ona sasan iha uma ba Sekretariadu eis Titular, iha area Farol.

“Daudauk ne’e aruma ona sasan sira iha ne’ebá (Farol), bainhira lori sai hotu sei entrega uma ne’e,” dehan fonte ne’e via telefone, Domingu (28/09).

Ba karreta eis titular no seguransa nia, fonte ne’e informa, desde PN aprova revogasaun LPMV, Taur la uza ona karreta refere.

“Iha Sesta ne’e karreta rua ne’e la uza ona,” fonte ne’e hatutan.

Entretantu, iha media sosial, utilizadór ida ho ID Nolasco Mendes, fó sai informasaun katak desde PN aprova revogasaun LPMV, hahú loraik Taur entrega kedas fasilidade estadu nian hanesan karreta no uma ba sekretáriadu Eis-titular nian.

Nolasco dehan, hahú Segunda semana oin rezidensia Eis-titular iha Faról sei la utiliza nu'udar eskritóriu ba Jeneral TMR nian.

Kona-ba seguransa husi PNTL ba Eis Prezidente Repúblika, sei hein hela karta despaisu husi Ministru Interior.

Maibé, nu'udar Eis Jeneral, Taur nafatin hetan seguransa husi Polísia Militár sira, bazeia ba Lei estatutu Militar nian.

“Hein katak ba oin Eis-titular hotu-hotu labele iha tan ona eskoltu rebo-rebo,” Nolasco hatete.

Xanana entrega karreta estadu

Asaun ne’ebé atu hanesan halo mós husi atual Xefe Governu, Kay Rala Xanana Gusmão.

Primeiru Ministru ne’e deklara sei entrega karreta ho marka Land Cruiser ho xapa matrikula PM, ba patrimoniu estadu.

PM Xanana bainhira hala’o lansamentu ba projetu estrada iha Same, Munisipiu Manatuto hatete, nia tenke fila hodi entrega karreta estadu.

“Ha’u tenke ba agora entrega karreta, lae manifestasaun fali ona,” deklara PM Xanana, Domingu (28/09).

Tuir informasaun husi fonte ne’ebé besik, PM Xanana sei entrega karreta ne’ebé Ministériu Finansas (MF) entrega ba nia iha fulan tolu liu ba.

“PM sei entrega karreta estadu ne’ebé Ministériu Finansas fó ba uza,” dehan fonte ne’e.

PM Xanana, nia dehan, sei uza ninia karreta privadu bainhira hala’o servisu.

“PM sei uza fali nia karreta privadu. Karreta ne’e Ministeriu Finansas fó maibé katuas lakohi sa’e,” nia hatete.