Print this page

Alkatiri Husu Governu Loke Dalan ba Munisipiu Featured

By Saturnina da Costa Abril 03, 2021 4291
Alkatiri Alkatiri

DILI: Sekretariu Jeral partido FRETILIN, Mari Alkatiri husu ba Governu ho urjentemente atu loke ona dalan (pontu entrada sira) ba ema sira ne’ebé hakarak fila ba sira nia knua ka Munisipiu.  

“Ba VIII Governu Konstitusionál, ha’u propoin hodi loke koredor ba “exodo urbanu” ba ema sira ne’ebé hakarak fila ba sira nia knua; disponbiliza transporte atu fasilita sira nia viajen no halo kontrole sanitariu efetivu liu;

identifika sidadaun ida-idak ne’ebe sai no viatura ne’ebé uza,”dehan eis Primeiru Ministru ne’e, liuhusi nia pajina facebok, sábdu ohin (3/4).

Maski nunee, Alkatiri fó hanoin nafatin atu sidadaun sira ne’ebé teste ona iha Dili labele hamutuk iha viatura ida deit ho sira ne’ebé seidauk teste.

Mobiliza partisipasaun husi familia no autoridade komunitaria sira, iha fatin ne’ebé sira atu ba, hodi fasilita kontrole sanitariu no permite atu halo teste SWAB ba sira hotu ne’ebé sai husi Dili sem teste, no teste daruak depois de minimu loron 10 ba ema hotu ne’ebe sai husi Dili.

“Urjente tebes atu halao ida ne’e hodi bele respeita vontade sidadaun sira nian sem tau em kauza nesesidadi husi sira ne’ebé luta hela kontra propagasaun Covid-19,”dehan nia.

Molok ne’e, sesta horsehik (2/4), komunidade sira iha Dili ne’ebé hakarak fila ba ida-idak nia Munisipiu halibur malu iha pontu entrada sira, hanesan Metinaro, Tasitolu no Manleu Beduku.

Kuaze ema rihun mak ezijé hodi loke dalan, maibé parte PNTL iha liña fronteira kontinua bandu atu labele sai husi serka sanitária Dili tuir rezolusaun Governu.

Prezidente Repúblika, Francisco Guterres Lú Olo, iha 31 marsu 2021, dekreta estadu emerjénsia dasanuluk-resin-rua ba loron loron tolu-nulu (30), hahú husi tuku 00.00 iha  3 abril 2021 no termina iha tuku 23.59 iha 2 maiu 2021, iha territóriu nasionál tomak.

Entretantu Governu liuhusi Konsellu Ministru (KM), prolonga ona serka sanitária iha munisipiu Dili ba loron 14 no ba munisipiu Baucau no Vikeke aumenta tan loron 7, hahú sura husi loron 2 Abril 2021 too remata.

 

Jornalista: Saturnina da Costa

Editor: Jose Sarito Amaral

Rate this item
(0 votes)

Related items