Reprezentante ADB iha Timor-Leste, Michael J. Walsh dehan, enkontru no atividade lubuk ne’ebé nia akompaña durante semana kotuk hatudu indikasaun klaru kona-ba aumentu númeru feto iha pozisaun lideransa iha instituisaun públiku.

“Ha’u nota katak reprezentante lider feto iha Timor-Leste nia númeru signifikativu tebes kompara ho nasaun seluk, no idane’e hatudu progresu di’ak,” dehan Walsh iha enkontru ho jornalista sira iha Salaun Palm Spring Hotel, Fatuhada, Tersa (09/06).

Nia afirma, igualdade jéneru la’ós asaun ida ne’ebé bele alkansa iha tempu badak, maibé presiza prosesu naruk no konsisténsia husi instituisaun hotu.

ADB, tuir nia, kontinua apoia programa sira ne’ebé envolve ajénsia relevante hodi asegura implementasaun polítika igualdade jéneru iha Timor-Leste.

“Igualidade jéneru la bele hadi’a iha kalan ida de’it. Ne’e prosesu naruk ne’ebé presiza tempu no kolaborasaun husi parte hotu,” nia hatete.

Iha parte seluk, Sekretária Estadu ba Igualidade (SEI), Elvina Sousa Carvalhodehan, partisipasaun feto iha lideransa públiku iha Timor-Leste seidauk to’o nivel perfeitu, maibé iha ona progresu klaru, liu-liu iha Komisaun Funsaun Públiku.

“Eliminasaun barak ba barreira sira iha ona, no agora feto barak mak okupa kargu hanesan Diretóra Jerál no Diretóra Nasionál,” dehan SEI.

Nia hatutan, objetivu prinsipal governu no SEI mak garante igualdade asesu ba feto no mane iha oportunidade lideransa, inklui iha prosesu foti desizaun.

Bazeia ba dadus ne’ebé SEI refere, aprosimadamente feto 30% iha ona pozisaun lideransa iha Komisaun Funsaun Públiku.

Númeru ne’e tuir SEI sei sofre alterasaun tuir dinamika nomeasaun no promosaun iha instituisaun sira, maibé tendensia jeral hatudu aumenta gradual.

SEI asegura katak ninia instituisaun kontinua serbisu hamutuk ho parseiru sira hodi hasa’e partisipasaun feto iha lideransa, ho objetivu atu asegura igualdade direitu no oportunidade iha setor públiku Timor-Leste.