Print this page

Aban Dili Bele Aplika Lockdown Featured

By Saturnina da Costa Marsu 07, 2021 549
Kapital nasaun Dili. Kapital nasaun Dili.

DILI:Hafoin ekipa prevensaun mitigasaun Covid-19 deteta ema na’in rua konfirmadu positivu, aldeia Terra Santa, BTN 2 Tasitolu Dili, fó posibilidade boot ba Munisipiu Dili aplika Lockdown total.

Kordenador Forsa Tarefa ba Prevensaun no Mitigasaun Surtu Covid-19 Dr. Rui Maria de Araujo informa katak, aban segunda-feira, Sala Situasaun Integradu Jestaun Krize (SIJK) sei hatoo proposta konkreta ba Konsellu Ministru atu bele toma desizaun kona-ba medidas ba Munisipiu Dili.

Maski nunee, Dr. Rui informa katak molok iha desizaun ruma husi Konsellu Ministru, sei kontinua aplika serka sanitaria ou konfinamentu.

Entretantu, iha aldeia Terra Santa, Tasitolu, SIJK kordena ona ho autoridade seguransa temporariamente, ohin kalan blokea aldeia Terra Santa no imediata atu garante komunidade nafatin iha uma.

“Ohin sala situasaun integradu jestaun krize konrdena ona ho autoridade seguransa atu temporariamente blokea aldeia terra santa no imediata atu garante komunidade nafatin iha uma,” dehan Dr. Rui iha sala SIJK, CCD Dili, Ohin.

Entre ema na’in 289 ne’ebé halo teste masal no foti sira nia amostra, deteta na’in rua mak konfirmadu positivu.

“Husi restreu ba kontatu ne’ebé ita halo iha bairo BTN 2, Tasitolu na’in rua mak hetan positivu ohin lorokraik, husi 289 ne’ebé ita halo amostra,”dehan Dr. Rui.

Ekipa prevensaun mitigasaun Covid-19 sei kontinua buka tuir ema ne’ebé halo kontaktu direita ho ema na’in rua ne’ebé positivu.

Kapital Dili hahu afeitadu hafoin deteta konfirmadu positivu iha Munisipiu Covalima no daet ba too iha Munisipiu Baukau.

Tuir dadus  kazu foun hamutuk na'in tolu, na'in rua husi Dili ne'ebe relata ohin kalan no na'in ida husi Covalima relata horseik lokraik. nune'e pasiente moras Covid-19 hamutuk 28, ne’ebé sei iha sala izolamentu Vera Crus Dili.

Rate this item
(0 votes)
Last modified on Domingu, 07 Marsu 2021 23:09